Bible

1 摩西將以下个指示交給以色列逐支族个領袖。上主所命令个就係恁樣： 2 有人向上主許願，抑係發誓來約束自家，攏總做毋得失信，一定愛照佢所講个去做。 3 細妹仔還在阿爸屋下个時，若係向上主許願，抑係發誓來約束自家， 4 除非厥爸聽到个時反對，姖就一定愛照所許个願去做，抑係照所發个誓來約束自家。 5 若係厥爸聽到个時毋准姖還願抑係約束自家，姖就毋使遵守。上主會原諒姖，因為厥爸毋准姖遵守。 6 若係吂結婚个細妹仔許願，抑係亂發誓來約束自家，結婚以後， 7 除非厥老公聽到个時反對，姖就一定愛照所許个願去做，抑係照所發个誓來約束自家。 8 若係厥老公聽到个時毋准姖還願抑係約束自家，姖就毋使遵守。上主會原諒姖。 9 寡婦抑係離婚个婦人家所許个願，抑係發誓愛約束自家个話，全部愛遵守。 10 若係已經結婚个婦人家許願，抑係發誓愛約束自家， 11 除非厥老公聽到个時反對，姖就一定愛照所許个願去做，抑係照所發个誓來約束自家。 12 若係厥老公聽到个時毋准姖還願抑係約束自家，姖就毋使遵守。上主會原諒姖，因為厥老公毋准姖遵守。 13 厥老公有權確認抑係取消姖所許个願㧯所發个誓。 14 總係，厥老公聽到姖許願，一日過一日恬恬無反對，姖就一定愛照所許个願去做，抑係照所發个誓來約束自家。厥老公在聽到姖許願該日無反對，就係確認姖所許个願。 15 後來，若係厥老公取消姖所許个願抑係所發个誓，老公就愛擔當厥𡜵娘个罪孽。 16 這係上主交給摩西有關住在阿爸屋下吂結婚个細妹仔抑係已經結婚个婦人家許願㧯發誓个條例。