Bible

1 下背所記載係哈迦利亞个孻仔尼希米个事。亞達薛西做波斯皇帝第二十年基斯流月，𠊎—尼希米住在波斯京城書珊。 2 𠊎个兄弟哈拿尼㧯一群人對猶大來到書珊城。𠊎向佢等打探對流亡巴比倫轉去个猶太同胞㧯耶路撒冷个情形。 3 佢等講：「該兜流亡還生个難民轉到家鄉，堵到當大个困難，被外族人侮辱。」佢等又㧯𠊎講：「耶路撒冷个城牆橫掉，城門被人燒掉。」 4 𠊎聽到這兜事，就坐下來，緊流目汁。𠊎悲傷好多日，無食東西。𠊎向上帝祈禱講： 5 「上主—天頂个上帝啊，你係至大、值得敬畏个上帝；你對愛你又遵守你誡命个人守慈愛个約。 6 上主啊，𠊎日夜為到你个眾僕人—以色列人民哀求个時，求你注目看𠊎、聽𠊎个祈禱！𠊎承認𠊎等以色列人得罪你；𠊎个祖先㧯𠊎全部有犯罪。 7 𠊎等惡意反抗你，毋遵行你通過你个僕人摩西頒佈給𠊎等个法律㧯誡命。 8 「求你記得你識㧯你个僕人摩西講：『若係你等對𠊎無忠心，𠊎愛將你等分散到別个國家； 9 若係你等歸向𠊎，遵行𠊎个命令，𠊎會帶你等轉來；就算你等流亡散到天邊，𠊎也會帶你等轉到這𠊎所選做敬拜𠊎个所在。』 10 「主啊，這兜全部係你个僕人，你自家个子民，係你識用大能大力救贖个人。 11 求你側耳垂聽僕人个祈禱，也聽歡喜敬畏你聖名眾僕人个祈禱。求你幫助僕人今晡日順利成功，使皇帝向𠊎開恩。」該時，𠊎係做皇帝个酒政。