Mark 4
1 耶穌又在加利利湖滣教訓眾人。有一大群人聚集到佢面前來，所以佢上船去坐等。船停在湖中，眾人企在湖个滣頭。
2 耶穌就用比喻教佢等盡多道理；其中，佢有講：
3 「你等注意聽啊！有一個委種个出去委種。
4 佢委个時，有兜種子落在路堘，鳥仔飛來將它兜食掉。
5 有兜落在泥盡淺个石頭地上；因為泥盡淺，種子盡遽就爆芽出來；
6 日頭出來一曬，嫩芽就枯燥掉去，因為根無罅深。
7 有兜落在竻仔底背，竻仔大起來，將秧仔拮等，就無法度結子。
8 另外有兜種子落在好泥底背，長大成熟，就結盡多子，有兜收成三十倍，有兜六十倍，有兜一百倍。」
9 耶穌結論講：「有耳公好聽个人，就愛聽！」
10 耶穌單淨一儕个時節，有兜聽過佢講道个人㧯十二個學生共下來見佢，請教佢這兜比喻个意思。
11 耶穌講：「對你等，上帝國个奧秘係用明講个；若係對外人，一切就愛用比喻。
12 像聖經所講：佢等看了又看，總係毋會了解，聽了又聽，總係毋會入耳；若毋係恁樣，佢等回心轉意，上帝就會赦免佢等。」
13 耶穌問佢等講：「你等無明白這個比喻係麼？恁樣，樣會明白其他个比喻？
14 委種个人所委个就係上帝个真道。
15 有兜人像落在路堘个種子；佢等一聽到真道，撒但即時就來，將委在佢等心中个真道搶走。
16 又有兜人像落在石頭地上个種子；佢等一聽到真道即時歡喜接受，
17 總係真道在佢等心中釘根無深，存無幾久，一下為到真道堵到困難抑係迫害，盡遽就跌倒。
18 還有兜人像委在竻仔底背个種子；佢等有聽到真道，
19 總係生活个操心、錢財个誘惑，㧯各種个慾望入來將真道歙等，無法度結果子。
20 總係，有兜人像委在好泥底背个種子；佢等聽到真道就接受，並結果子，有兜收成三十倍，有兜六十倍，有兜一百倍。」
21 耶穌又對佢等講：「有麼人點燈，拿來放在斗底下抑係眠床下？敢毋係愛放在燈臺頂嗎？
22 逐項隱藏个事最後會顯明出來；囥等个事最後也會被人挖出來。
23 有耳公好聽个人，就愛聽！」
24 佢又㧯佢等講：「你等所聽个愛留心！你等用麼介東西量給別人，上帝也愛用共樣个東西量給你等，甚至愛還較多。
25 有个，愛給佢還較多；無个，連佢所有个一些些仔也愛搶走。」
26 耶穌繼續講：「上帝个國像一個人委種在地上。
27 佢暗晡頭睡目，日時頭䟘床，該兜種子爆芽長大，樣般會恁樣，佢毋知。
28 泥自然會使植物生長結子：先爆芽，然後打串，最後結盡多子。
29 五榖熟了，佢就用禾鐮收割，因為收成个時節到了。」
30 耶穌講：「𠊎等講上帝个國像麼介呢？𠊎等做得用麼介比喻來說明呢？
31 上帝个國可比一粒芥菜子，係世間最細个種子。有人將它種在泥肚，
32 過無幾久，它就大起來，比別樣菜較高大；它生出粗枝，飛鳥在它陰涼个所在做藪。」
33 耶穌用盡多像恁樣个比喻對眾人講道，照佢等所能明白个來教佢等。
34 佢對佢等講道盡愛用比喻；總係單淨同學生共下个時，佢就全部解釋給佢等聽。
35 該日暗晡，耶穌㧯學生講：「𠊎等坐船來去湖對面該片。」
36 佢等就離開眾人。耶穌已經在船頂坐好勢，學生就開船；另外也有別个船共下去。
37 忽然，有一陣暴風吹等來，波浪盡大，打入船肚，船肚个水差毋多會淰起來。
38 該時，耶穌還在船尾，墊等枕頭睡目。佢等喊醒佢，講：「先生，𠊎等會無命囉，你無愛搭𠊎等係麼？」
39 耶穌醒過來，責備風講：「停下來！」又吩咐浪講：「恬恬！」風就停下來，湖面就大大平靜。
40 耶穌問佢等講：「做麼介恁驚？你等還無信心係麼？」
41 佢等就盡驚，彼此講：「這個人到底係麼人，連風㧯浪也聽從佢！」