Mark 1
1 上帝个孻仔，耶穌基督个福音係恁樣開始个。
2 像先知以賽亞在佢个書底背所寫个：上帝講：「看啊，𠊎愛差派𠊎个使者做你个先鋒；佢愛為你開路。」
3 在曠野有人喊講：「愛準備好勢主个道路，修直佢所愛行个細路！」
4 約翰就係恁樣在曠野出現，為人行洗禮。佢宣佈講：「你等愛棄絕罪惡，接受洗禮，上帝就會赦免你等个罪。」
5 非常多个人對猶太个逐所在㧯全耶路撒冷來到約翰个面前。佢等承認自家个罪；約翰就在約旦河為佢等行洗禮。
6 約翰著等駱駝毛做个衫，腰圈䌈等皮帶；食草蜢㧯野蜂糖過日仔。
7 佢宣佈講：「有一個人，比𠊎較慢來个，佢比𠊎偉大盡多。𠊎就係跍下來㧯佢脫鞋也無資格。
8 𠊎係用水為你等行洗禮，總係佢愛用聖靈為你等行洗禮。」
9 無幾久以後，耶穌對加利利省个拿撒勒來，約翰就在約旦河為佢行洗禮。
10 耶穌對水中一上來，就看到天開，聖靈像月鴿仔一樣，降在佢个身上；
11 對天頂有聲音傳下來，講：「你係𠊎所惜个孻仔，𠊎所歡喜个。」
12 聖靈即時催迫耶穌去到曠野。
13 佢在曠野四十日，受撒但个試探；佢㧯野獸共下，並有天使來服事佢。
14 約翰被人關在監獄以後，耶穌去到加利利，宣傳上帝个福音。
15 佢講：「時間已經到了，上帝个國會實現了！你等愛棄絕罪惡，信從這個福音。」
16 耶穌在加利利湖邊行个時，看到兩個打魚个人—西門㧯厥老弟安德烈—在湖中委網打魚。
17 耶穌對佢等講：「來跈𠊎！𠊎愛使你等得到人像打到魚一樣。」
18 佢等即時放下網仔，跈耶穌去。
19 向前行無幾遠，耶穌又看到西庇太个孻仔雅各㧯約翰；佢兩兄弟在船頂整理魚網。
20 耶穌即時呼召佢兩儕，佢等就將阿爸西庇太㧯工人留在船頂，跈耶穌去。
21 佢等來到迦百農城，耶穌就在安息日入去會堂，在該位教人。
22 聽到佢教訓个人攏總感覺非常奇怪，因為佢教訓佢等个時盡有權柄，㧯一般个經學教師無共樣。
23 堵好，在佢等个會堂肚有一個邪靈附身个人喊講：
24 「拿撒勒个耶穌，你樣般來干涉𠊎等？你來消滅𠊎等係麼？𠊎知你係麼人；你係上帝个聖者！」
25 耶穌命令該隻邪靈講：「恬恬，對這人身上出來！」
26 邪靈使該人全身愊愊掣，然後大噭一聲，就對厥身上出來。
27 眾人非常著驚，偷偷議論講：「這到底係麼介事情！實在係新个教訓！佢竟然有權柄指揮邪靈，邪靈也正經服從佢个命令！」
28 恁樣，耶穌个名聲盡遽就傳遍加利利个所在。
29 佢等一離開會堂，就到西門㧯安德烈个屋下去；雅各㧯約翰也共下去。
30 西門个丈人𡟓堵堵發燒，睡在眠床頂；耶穌一到，佢等就將姖个病㧯耶穌講。
31 耶穌去看姖，牽姖个手，扶姖䟘起來。姖个燒就退掉；姖䟘起來招待佢等。
32 到臨暗仔，日頭落山个時，有盡多人帶各種个病人㧯被鬼附身个人來到耶穌个面前；
33 城內个人全部聚集到門前來。
34 耶穌醫好各種病症个人，也逐走盡多鬼。佢不准鬼講話，因為佢等知佢係麼人。
35 第二日打早，天還吂光，耶穌就䟘床，出去外背偏僻个所在，在該位祈禱。
36 西門㧯佢个同伴出去尋佢；
37 尋到以後，就對佢講：「大家全部在該位尋你！」
38 耶穌講：「𠊎等來去附近个村莊，𠊎也應當愛在該兜所在傳道，因為這係𠊎來个目的。」
39 恁樣，耶穌行遍加利利全地，在各地方个會堂傳道，又逐鬼。
40 有一個發癩个人來到耶穌个面前，跪落去求佢講：「你若係肯，就會使𠊎淨浰。」
41 耶穌心中充滿憐憫，伸手摸佢，應佢講：「𠊎肯，你淨浰了！」
42 佢身上个癩即時無掉去，佢就得到淨浰。
43 耶穌黏時喊佢離開，也再三吩咐佢講：
44 「毋好將這件事㧯別人講；直接去見祭司，俾佢檢查，然後照摩西所定个規矩獻祭物，來對人證明你已經淨浰了。」
45 總係這個人一出去，反轉四處宣傳這項事情，害耶穌無法度再公開入城，只有住在城外偏僻个所在。眾人還係對四圍來尋佢。