Luke 8
1 過一站時間，耶穌行遍逐個城市㧯鄉村，傳上帝國个福音；十二個學生也跈等佢。
2 另外還有兜婦人家，全部係識因為邪靈附身抑係發病被耶穌醫好个；其中有抹大拉个馬利亞，姖身上識有七個鬼被耶穌逐出去；
3 還有希律官廳个官員苦撒个𡜵娘約亞娜，㧯蘇撒娜，並其他好多婦人家。姖等攏總拿自家个東西供給耶穌㧯厥學生。
4 歸大陣个人對逐位城市出來就近耶穌个時，耶穌用這個比喻對佢等講：
5 「有一個委種个出去委種。佢委个時，有兜種子落在路堘，被人踐踏，鳥仔飛來將它兜食掉。
6 有兜落在石頭地上，種子爆芽後就枯燥掉去，因為無水分个滋潤。
7 有兜落在竻仔底背，竻仔跈等大起來，將秧仔拮等。
8 另外有兜種子落在好泥底背，爆芽，大起來，結子百倍。」耶穌講煞這兜話，就大聲講：「有耳公好聽个人，就愛聽！」
9 耶穌个學生來問佢這比喻个意思。
10 佢講：「對你等，上帝國个奧秘係用明講个；若係對別人，就愛用比喻，使佢等看也看毋識，聽也毋會明白。
11 「這比喻个意思係恁樣：種子係指上帝个真道。
12 落在路堘个種子係指人一聽到真道，魔鬼即時就來，將佢等心中个真道搶走，使佢等無法度因信來得救。
13 落在石頭地上个種子係指人一聽到真道即時歡喜接受，總係真道在佢等心中釘根無深；佢等暫時相信，總係一堵到考驗就跌倒。
14 落在竻仔底背个種子係指人聽了真道後，生活个操心、錢財㧯享樂个誘惑，將佢等歙等，無法度結熟个果子。
15 落在好泥底背个種子係指人聽了真道以後，用良善㧯誠實个心來保守，耐心等下去，直到佢結出果子。
16 「無人點燈，然後用斗將它揜起來，抑係放在眠床下。佢一定係將燈放在燈臺頂，使入來个人看得到光。
17 逐項隱藏个事最後會顯明出來；囥等个事最後也會被人挖出來，公開俾人知。
18 「所以，你等愛細膩樣般來聽；因為有个，愛給佢還較多；無个，連佢自家恅到有个一些些仔，也愛搶走。」
19 耶穌个阿姆㧯老弟來看佢，總係因為人盡多，無法度接近佢。
20 有人㧯耶穌講：「看啊，若姆㧯若老弟企在外背，愛見你！」
21 耶穌對佢等講：「該兜聽上帝个道理就實行个人，就係𠊎个阿姆㧯兄弟！」
22 有一日，耶穌㧯學生上船；佢㧯佢等講：「𠊎等來去湖對面該片！」佢等就出發。
23 船行个時，耶穌睡掉。忽然，有一陣暴風在湖面吹等來，佢等被浪激到歸身，非常危險。
24 學生來喊醒佢，講：「先生，先生，𠊎等會無命囉！」耶穌醒過來，責備風㧯大浪，風浪就停下來，湖面平靜。
25 耶穌問佢等講：「你等个信心㖠位去？」佢等盡希奇又著驚，彼此講：「這個人到底係麼人？佢命令風㧯浪，風浪也聽從佢！」
26 佢等過了加利利湖，去到對面革拉森人个地區。
27 耶穌一上岸，就堵到一個被鬼附身个城內人，對面行等來。這人盡久以來就毋著衫，毋住人屋，反轉住在塚埔。
28 佢一看到耶穌，就喊起來，伏在耶穌面前，大聲講：「至高上帝个孻仔耶穌，你做麼介愛干涉𠊎呢？𠊎求你莫蹧踏𠊎！」
29 佢恁樣講，係因為耶穌有吩咐邪靈對該人身上出來。原來該人被邪靈附身盡多擺，被人捉去關，用手銬腳鐐鎖等；總係邪靈上身个時節，手銬腳鐐卻被佢扭斷，鬼就帶佢走去曠野。
30 耶穌問佢講：「你安到麼介名？」佢應講：「𠊎安到『大群』」，因為有盡多鬼附在佢个身上。
31 鬼求耶穌，莫逐佢等入去無底坑。
32 在附近山排頂，堵好有一大群豬仔在該位食東西。鬼求耶穌准佢等入去豬群；耶穌准佢等。
33 鬼就對該人身上出來，入去豬群；歸群豬仔衝下崩崗，跌落湖底背，全部浸死。
34 掌豬仔个人看到這個事就走掉；佢等去城肚㧯周圍个鄉村講起這個事。
35 眾人就出來看，到底發生麼介事情。佢等來到耶穌該位，看到鬼所離開个該人坐在耶穌个腳前，著好衫褲，頭腦清醒；佢等就盡著驚。
36 看到這事情个人，將該原來被鬼附身个人得到醫好个經過對大家講。
37 格拉森地區个人全部要求耶穌離開該位，因為佢等非常驚；耶穌就上船倒轉去。
38 該鬼已經對佢身上出來个人求耶穌講：「𠊎跈你去好無？」總係耶穌喊佢轉去，講：
39 「轉去若屋下，去㧯人講，上帝為你所做个事係樣般个大。」佢就離開，行遍全城，宣傳耶穌為佢所做个事情係樣般个大。
40 耶穌轉到湖對面个時，眾人歡歡喜喜迎接佢，因為佢等全部在該位等等佢。
41 有一個會堂个管理員，名安到葉魯，也來。佢伏在耶穌个腳前，求耶穌去厥屋下，
42 因為佢有一個差毋多十二歲个獨生女，會斷氣了。耶穌去个時，眾人尖等佢。
43 有一個婦人家，發血漏病十二年，被盡多醫生看過，用盡姖所有个錢財，無人醫得好姖。
44 姖行到耶穌个後背，摸耶穌个衫尾；姖个血漏黏時就停止。
45 耶穌問講：「麼人摸𠊎？」眾人無一個承認。彼得講：「先生，大家圍圍𢵸𢵸，尖等你啊！」
46 總係耶穌講：「有人摸𠊎，因為𠊎感覺有能力對𠊎个身上出去！」
47 該婦人家知自家已經被人發覺，就愊愊掣，來到耶穌个面前跪落去，在大家面前㧯佢講，做麼介摸佢，又樣般黏時得到醫好。
48 耶穌對姖講：「妹仔啊，你个信心救到你！安心轉去！」
49 耶穌還講等這句話个時，有人對會堂管理員个屋下趕來，㧯葉魯講：「若妹仔已經死掉，毋使勞動先生了！」
50 耶穌聽到，就對葉魯講：「毋使驚，只愛信！若妹仔就會得到救。」
51 耶穌到葉魯屋下个時，除了彼得、約翰、雅各並細阿妹仔个爺𡟓，毋肯別人跈佢共下入去。
52 眾人為到細阿妹仔个緣故，攏總在該位亂吵吵大聲噭。耶穌講：「毋好噭！姖並無死，係睡掉定定。」
53 大家就笑佢，因為佢等知細阿妹仔已經死掉了。
54 耶穌牽等姖个手，喊講：「細阿妹仔，䟘起來！」
55 細阿妹仔就返生，黏時䟘起來。耶穌交帶佢等拿兜東西給姖食。
56 細阿妹仔个爺𡟓非常希奇；耶穌嚴嚴吩咐佢等，毋好對別人講起這個事情。