Leviticus 7
1 以下係贖過失祭个條例；這祭係至聖个。
2 愛在祭壇北片，就係㓾燒化祭頭牲个地方，㓾贖過失祭个頭牲，將血洒在祭壇四周圍。
3 全部个油，就係歸條肥个尾、包等腹內个油、
4 兩隻腰仔㧯腰仔面頂个油、肝个網油，攏總愛放在祭壇頂。
5 祭司愛在祭壇頂將全部个油燒獻給上主；這係贖過失祭。
6 祭司家族中所有个男人全部做得食這種祭肉，總係一定愛在聖个所在食，因為這祭係至聖个。
7 贖罪祭㧯贖過失祭个條例有一項係共樣个：祭肉愛歸主持贖罪禮个祭司。
8 燒化祭頭牲个皮愛歸主持祭禮个祭司。
9 素祭，無論係用爐仔焙个、用煎盤煎个，抑係用淺鑊頭煏个，全部愛歸主持祭禮个祭司。
10 總係生个素祭，無論係攪油个抑係燥个，攏總愛歸給亞倫族所有个祭司；佢等愛平均分配這兜祭物。
11 以下係有關向上主獻平安祭个條例。
12 若係有人為到愛感謝上主來獻平安祭，除了這感謝祭以外，還愛獻無酵个餅：就係幼麵粉攪橄欖油做个賁餅、膏橄欖油个薄餅，㧯幼麵粉攪橄欖油个餅。
13 佢還愛獻一些仔有酵个餅。
14 佢愛對這兜餅當中各拿一隻做特別个禮物獻給上主。這禮物愛給該將平安祭个血洒在祭壇四周圍个祭司。
15 為到感謝上主所獻个平安祭个祭肉，愛在獻祭當日食掉，做毋得留到第二朝晨。
16 所獻个平安祭若係為到還願抑係甘心獻个祭，祭肉愛在獻祭當日來食，總係所賸到个做得留到第二日正食。
17 若係到第三日還有賸到个祭肉，一定愛燒掉。
18 若係在第三日還食平安祭个肉，上帝就毋接受佢所獻个祭；佢所獻个毋算做祭。這牲儀係無淨浰个；無論麼人食這種祭肉，就愛承擔自家个罪。
19 若係祭肉接觸禮儀上無淨浰个東西抑係人，就做毋得食，愛燒掉。禮儀上定為淨浰个人，無論麼人，全部做得食祭肉。
20 總係禮儀上無淨浰个人，若係食獻給上主平安祭个肉，一定愛將佢對上帝个子民中除名。
21 若有人接觸禮儀上無淨浰个東西—無論係人，抑係頭牲，抑係任何無淨浰个東西—然後還食獻給上主平安祭个肉，一定愛將佢對上帝个子民中除名。
22 上主吩咐摩西
23 將以下个條例宣佈給以色列人。牛、綿羊㧯山羊个油全部做毋得食。
24 自然死掉抑係被野獸咬死个動物个油也做毋得食，總係做得做別个用途。
25 無論麼人食燒獻給上主頭牲个油，一定愛將佢對上帝个子民中除名。
26 無論你等住在㖠位，飛禽个血抑係走獸个血全部做毋得食。
27 麼人食血，一定愛將佢對上帝个子民中除名。
28 上主吩咐摩西
29 將以下个條例宣佈給以色列人。無論麼人獻平安祭，佢一定愛將一部份祭肉獻給上主做禮物。
30 佢愛親手將這兜禮物帶來獻給上主做火祭。佢愛帶頭牲个油㧯胸脯肉來，將胸脯肉搖幾下做搖祭獻給上主。
31 祭司愛將油放在祭壇頂來燒；總係胸脯肉愛給亞倫㧯佢个子孫。
34 平安祭中个胸脯肉㧯右後腿，係上主對以色列人中拿出來賜給祭司亞倫㧯佢个子孫个一種特別禮物。以色列人一定愛將這兜歸給該兜祭司。這係永遠毋會改變个規定。
35 這兜祭肉係對亞倫㧯佢个子孫受設立做祭司事奉上主該日就指定給佢等个。
36 該一日，上主命令以色列人將這兜祭肉分給該兜祭司。以色列人一定愛永遠遵守這條例。
37 以上記載个就係有關燒化祭、素祭、贖罪祭、贖過失祭、設立祭司、㧯平安祭个條例。
38 上主在曠野个西奈山將這兜條例吩咐摩西。該日，摩西命令以色列人向上主獻祭。