Leviticus 26
1 上主講：「你等做毋得做偶像；你等做毋得設立神像抑係石柱，也做毋得在你等个地上放雕刻个石頭來做敬拜个對象。𠊎係上主—你等个上帝。
2 你等愛守𠊎个安息日，尊重𠊎个聖所。𠊎係上主。
3 「你等若係實行𠊎个法律，遵守𠊎个誡命，
4 𠊎愛照時落水給你等，使土地出產五榖，果樹打果子。
5 你等會有五榖，一直收到葡萄熟个時；你等个葡萄會摘到委種个時。你等會有充足个糧食，會在自家个土地上安居樂業。
6 「𠊎愛使你等个土地太平；你等做得一覺睡到天光，毋會被人嚇倒。𠊎愛將兇惡个野獸對你等个土地收掉；戰爭也毋會打到你等个土地。
7 你等會追擊敵人，用刀劍打贏佢等。
8 你等五個人會追擊一百人，你等一百人會追擊一萬人；敵人全部會死在你等个刀劍之下。
9 𠊎愛賜福給你等，使你等多子多孫。𠊎愛堅定㧯你等所立个約。
10 你等會有盡多个糧食，歸年無欠，甚至愛豁掉舊糧來囤新糧。
11 𠊎愛在𠊎个聖帳篷底背㧯你等共下住，絕對毋會離開你等。
12 𠊎愛行在你等當中，做你等个上帝；你等愛做𠊎个子民。
13 𠊎係上主—你等个上帝。𠊎識𢱋你等出埃及，使你等無再做埃及人个奴才。𠊎識打碎你等个軛，使你等做得行路有風。」
14 上主講：「你等若毋聽從𠊎，毋遵行這一切个誡命，你等會受到責罰。
15 你等若豁掉𠊎个法律㧯條例，毋遵行𠊎一切个誡命，違背㧯𠊎立个約，
16 𠊎會責罰你等。𠊎會降災禍給你等，使你等著驚、發絕症、發熱病、目珠花花、全無元氣。你等會委種，總係有功打無勞，因為你等所種个會被敵人食淨淨。
17 𠊎會對你等變面，你等就會被仇敵打敗。恨你等个人會來統治你等，嚇到你等毋使人逐也會走到無愛命。
18 「你等若係經過這兜災難還毋聽從𠊎，因為你等个罪，𠊎給你等个刑罰就會加七倍。
19 𠊎會打碎你等个硬頸㧯驕傲；𠊎會使天頂像鐵毋會落水，使你等个土地燥到像銅恁硬。
20 無論你等樣般煞猛也會空空，因為土地毋會生產，果樹毋會打果子。
21 「你等若係繼續㧯𠊎作對，還毋聽從𠊎，因為你等个罪，𠊎給你等个災禍會再加七倍。
22 𠊎會放兇惡个野獸到你等當中；牠兜會搶食你等个子女，吞掉你等个頭牲，使你等人數減少，道路荒涼。
23 「經過這兜刑罰以後，你等若還係毋接受𠊎个管教，繼續㧯𠊎作對，
24 𠊎就會㧯你等作對；因為你等个罪，𠊎會再加七倍打擊你等。
25 𠊎會用戰爭責罰你等背約个罪。你等若係聚集在城肚，𠊎會使你等發瘟；𠊎也會將你等交在敵人个手中。
26 𠊎會切斷你等个糧食，使到十個婦人家共用一隻灶頭焙餅就罅。姖等所配給个餅會盡少，你等雖然有東西食，總係食毋飽。
27 「經過這兜刑罰以後，你等若還係毋聽從𠊎，繼續㧯𠊎作對，
28 𠊎就會大發譴對付你等；因為你等个罪，𠊎會再加七倍責罰你等。
29 你等會餓到食自家子女个肉。
30 𠊎會拆掉你等山頂个神廟，斬橫你等个香壇，將你等个身屍㧒在橫掉个偶像頂高。𠊎个心會當惱你等。
31 𠊎會使你等个城市變做荒埔；𠊎會廢掉你等敬拜个地方，拒絕你等清香个牲儀。
32 𠊎會使你等个土地完全荒廢，連佔領這土地个敵人看到也會著驚！
33 𠊎會將你等分散到外國去；𠊎也會擎劍逐你等。你等个土地會荒廢，你等个城市變做荒埔。
36 「𠊎會使流亡在敵人國內个人非常著驚，連風吹落葉个聲音也會使你等驚到逃走。你等會像在戰場被人逐到緊走，無人逐也會緊跌倒。
37 無人逐也會相撞；你等毋會有力量好抵抗敵人。
38 你等會在流亡中死掉，被敵人个土地吞掉。
39 你等賸到个人會因為自家㧯祖先个罪，在敵人土地上消滅。
40 「總係，你等个後代會承認自家个罪過，也會承認祖先个罪過，因為佢等悖逆𠊎，㧯𠊎作對，
41 惹𠊎來對付佢等，將佢等逐到敵人个土地。總係你等个後代最後會有謙卑个心，為自家个罪㧯悖逆來接受刑罰。
42 該時，𠊎會想起𠊎㧯雅各所立个約，㧯以撒所立个約，㧯亞伯拉罕所立个約；𠊎也會紀念這土地。
43 總係，一定愛先將這土地个人民逐走，俾土地好享受安息年；這兜人民因為豁掉𠊎个法律，違背𠊎个誡命，一定愛接受應該有个刑罰。
44 雖然恁樣，佢等還在敵人土地上个時，𠊎一定毋會完全㧒掉佢等，抑係毀滅佢等，也毋會廢掉𠊎㧯佢等所立个約。𠊎係上主—佢等个上帝。
45 𠊎愛㧯佢等重新立𠊎㧯佢等祖先立過个約。𠊎識向列國顯明𠊎个大能，對埃及將𠊎个子民𢱋出來，使𠊎做佢等个上帝。𠊎係上主。」
46 以上个法律、條例㧯誡命係上主在西奈山交給摩西、愛佢向以色列人宣佈个。