Leviticus 22
1 上主吩咐摩西
2 對亞倫㧯佢該兜孻仔講：「你等一定愛細膩處理以色列人獻給𠊎个聖物，免得你等侮辱𠊎个聖名。𠊎係上主。
3 你等个後代中，若有人在禮儀上無淨浰个時，還接近以色列人獻給𠊎个聖物，佢做毋得再過在𠊎个祭壇事奉𠊎。你等个後代愛永遠遵守這條例。𠊎係上主。
4 「亞倫个後代中，所有發癩抑係發遺漏症个人，一定愛等到淨浰後，正做得食神聖个牲儀。祭司若係憑到該因為接觸屍體抑係接觸漏精症个人無淨浰个東西，
5 抑係摸到其他無淨浰个動物抑係人，就無淨浰。
6 祭司無淨浰以後一直到該日臨暗仔全部無淨浰。佢一定愛洗身，正做得食神聖个牲儀。
7 日頭落山以後，佢就淨浰，做得食神聖个牲儀，因為該就係佢个食物。
8 佢做毋得食自然死掉抑係被野獸咬死个動物，免得打垃圾自家。𠊎係上主。
9 「所有个祭司全部應該遵守𠊎所頒佈个例規；若無，佢等就有罪，一定會死，因為佢等褻瀆𠊎神聖个例規。𠊎係使佢等成做聖潔个上主。
10 「只有祭司屋下个人正做得食神聖个牲儀；其他个人全部做毋得食，就算住在祭司屋下个人客抑係請个工人也做毋得食。
11 總係祭司个奴僕，無論係用錢買个抑係在佢屋下出世个，全部做得食祭司分到个牲儀。
12 祭司个妹仔若嫁給毋係祭司个平民就做毋得食神聖个牲儀。
13 總係祭司个妹仔若成做寡婦抑係離婚，又無子女，姖轉到外家來住，就做得食阿爸做祭司所分到个食物。只有祭司屋下个人正做得食牲儀。
14 「若有一般人毋堵好食到神聖个祭物，佢愛照原來个價錢加五分之一賠給祭司。
15 祭司毋好俾一般个以色列人隨便食獻給上主神聖个牲儀來打垃圾牲儀；
16 恁樣會害該兜人犯罪，受責罰。𠊎係使佢等成做聖潔个上主。」
17 上主吩咐摩西
18 向亞倫、佢該兜孻仔，並以色列全人民講：「以色列人抑係暫時住在以色列个旅客，所有獻燒化祭給上主个，無論係還願抑係甘心奉獻个，
19 一定愛獻無缺點个牛牯、綿羊牯，抑係山羊牯正會得到接納。
20 你等若獻有缺點个頭牲，上主毋會接納。
21 無論麼人，為到還願抑係甘心獻平安祭給上主，一定愛獻無缺點个牛抑係羊，正會得到接納。
22 做毋得將瞙目个、跛腳个、破相个、皮肉有傷、腫，抑係發癬个頭牲獻給上主。做毋得獻這種頭牲在祭壇頂做火祭給上主。
23 你等做得獻發育毋好抑係畸形个牛抑係細綿羊做甘心祭，總係這種頭牲做毋得做還願祭。
24 做毋得將卵損傷、磧碎、裂掉，抑係割掉个頭牲獻給上主。在你等个地上做毋得有這種事。
25 以上个頭牲，你等也做毋得對外族人拿來做獻給上帝个食物。這兜頭牲算係有損傷、有缺點个，毋會得到上主接納。」
26 上主吩咐摩西講：
27 「正出世个細牛牯、細綿羊，抑係細山羊，在七日內做毋得使牠㧯牛乸抑係羊乸分開。第八日以後，牠就做得當做火祭獻給上主。
28 做毋得在共日將牛乸㧯細牛、綿羊乸㧯細綿羊、山羊乸㧯細山羊㓾來獻祭。
29 「獻感謝祭給上主个時，愛照條例獻正會得到接納。
30 你等愛在該日將祭肉食掉，連一垤做毋得留到第二朝晨。𠊎係上主。
31 「你等愛謹守實行𠊎个誡命；𠊎係上主。
32 你等做毋得侮辱𠊎个聖名；以色列人一定愛尊敬𠊎做聖潔个。𠊎係使你等成做聖潔个上主；
33 𠊎識𢱋你等出埃及，愛做你等个上帝。𠊎係上主。」