Leviticus 16
1 亞倫个兩個孻仔親近上主，死掉以後，上主就對摩西講：
2 「愛㧯若哥亞倫講，做毋得隨時隨意進入帳幔後背个至聖所、到約櫃頂贖罪个蓋仔面前，免得佢死掉；因為𠊎在贖罪个蓋仔頂對雲中顯現。」
3 接等，上主宣佈以下个指示。亞倫進入聖所，愛牽一隻細牛牯做贖罪祭，㧯一隻綿羊牯做燒化祭。
4 佢愛洗身，然後著好祭司禮服：著麻紗做个聖內衫㧯短褲，繫等麻紗做个腰帶，又戴麻紗做个帽仔。
5 以色列會眾愛將獻祭个頭牲交給佢：兩隻山羊牯做贖罪祭，一隻綿羊牯做燒化祭。
6 亞倫一定愛為自家㧯佢个家屬獻該隻牛牯做贖罪祭。
7 然後，佢愛牽該兩隻山羊牯到聖帳篷門口，放在上主面前，
8 為兩隻山羊牯抽籤，一籤寫「歸給上主」，另外一籤寫「歸給阿撒瀉勒」。
9 亞倫愛將抽到「歸給上主」个山羊牯獻做贖罪祭，
10 將抽到「歸給阿撒瀉勒」个另外一隻山羊牯生生獻給上主，然後放到曠野去歸給阿撒瀉勒，為人民贖罪。
11 亞倫愛為自家㧯佢个家屬獻該隻牛牯做贖罪祭；佢將這牛牯㓾掉以後，
12 愛拿等香爐，對上主面前个祭壇頂裝滿火炭，並帶等兩揢香粉，進入帳幔後背个至聖所。
13 佢愛在上主面前燒香，使煙遮等約櫃頂贖罪个蓋仔，免得佢死掉。
14 佢愛拿兜牛牯个血，用手指搵血，拂在贖罪个蓋仔東片，又在贖罪个蓋仔頭前拂七擺。
15 接等，佢愛㓾山羊牯，為人民獻贖罪祭。佢愛將羊血帶入帳幔後背个至聖所，拂在贖罪个蓋仔頂㧯蓋仔頭前，就像佢拂牛血恁樣。
16 因為以色列人个無淨浰㧯所犯一切个罪，佢愛用這種方法為至聖所行潔淨禮；佢也愛為聖帳篷行潔淨禮，因為聖帳篷在營个中間，營在禮儀上係無淨浰个。
17 對亞倫進入至聖所行潔淨禮到佢出來个這站時間，聖帳篷底背做毋得有人。佢愛為自家、厥家屬、㧯以色列全會眾行贖罪禮。
18 然後佢愛出來，愛到上主面前个祭壇獻燒化祭，潔淨祭壇。佢愛拿兜牛牯个血㧯山羊牯个血，膏在祭壇个四隻角。
19 佢一定愛用手指搵血，在祭壇頂拂七擺。佢愛用這種方法，除掉以色列人个污穢，潔淨祭壇，使它成做聖潔。
20 亞倫為至聖所、聖帳篷、㧯祭壇行潔淨禮以後，就愛將「歸給阿撒瀉勒」該隻生个山羊牯牽過來。
21 佢愛將雙手放在羊个頭那頂，承認以色列人一切个罪惡㧯過犯，將這兜罪全部歸到羊个頭頂，然後派一儕將這隻羊送到曠野去。
22 這隻羊就愛擔當佢等一切个罪，全部帶到無人住个地方去；該儕人就愛將羊留在曠野。
23 然後，亞倫愛進入聖帳篷底背，將佢入至聖所个時所著个祭司禮服脫下來，放在該位。
24 佢愛在聖个所在洗身，著好便服，然後出來為自家㧯人民个罪獻燒化祭。
25 佢愛在祭壇頂燒牲儀个油做贖罪祭。
26 該將山羊牯送到曠野「歸給阿撒瀉勒」个人，佢一定愛先洗淨衫褲也愛洗身正做得轉到營肚。
27 愛將贖罪祭个牛牯㧯山羊牯帶到營外燒；皮、肉、腸全部愛燒掉。牠兜个血已經帶入至聖所贖罪了。
28 該燒頭牲个人一定愛先洗淨衫褲也愛洗身正做得轉到營肚。
29 以色列人愛永遠遵守以下个條例。逐年七月初十，以色列人㧯暫時住在佢等當中个旅客一定愛禁食、刻苦自家，做毋得做事。
30 在這一日，愛為佢等行贖罪禮，潔淨佢等，使佢等在上主面前淨浰，除掉佢等所有个罪。
31 這係至聖个安息日；佢等一定愛禁食、刻苦自家，做毋得做事。這係永遠个條例。
32 該照法設立、承接阿爸執行祭司職務个大祭司愛行贖罪禮。佢愛著好祭司禮服，
33 為至聖所、聖帳篷，㧯祭壇舉行潔淨禮，也為其他个祭司㧯全部會眾舉行贖罪禮。
34 這個條例一定愛永遠遵守。這贖罪禮逐年一定愛舉行一擺，為以色列人除掉所有个罪。摩西就遵照上主个命令去做。