Bible

1 上主个天使對吉甲到波金，對以色列人民講：「𠊎𢱋你等離開埃及，到𠊎應許給你等祖先个土地。𠊎識講過，𠊎絕對毋會廢掉㧯你等立个約； 2 你等絕對做毋得㧯當地个人民立麼介契約。你等愛拆掉佢等个祭壇。總係，你等無照𠊎个話做，偏偏去做𠊎毋准你等做个事。 3 所以，𠊎㧯你等講，你等向前進个時，𠊎毋將該地个人民逐走。佢等定著會成做你等个仇敵；佢等个神明會引誘你等陷入羅網。」 4 上主个天使這兜話一講煞，以色列人民就開聲大噭， 5 所以該地方个名安到波金。佢等在該位向上主獻祭。 6 約書亞解散以色列人民；各支族就分開去佔領自家分到个土地。 7 約書亞在世个時，以色列人民攏總事奉上主；佢死後，該兜親目看到上主為以色列行奇事个長老還在个時，以色列人民還係事奉上主。 8 上主个僕人嫩个孻仔約書亞一百一十歲个時過身。 9 以色列人民將佢安葬在佢分到个土地，就係迦實山北片以法蓮山區个亭拿‧西拉。 10 該代人也全部過身、轉到祖宗該位去。下一代人興起，就毋識上主，乜毋知上主為以色列人民所做个一切事。 11 後來，以色列人民行上主看做邪惡个事，開始去拜該兜巴力。 12 佢等離開𢱋佢等出埃及个上主—佢等祖先个上帝，去拜別个神，就係佢等周圍各國人所拜个神明，惹上主發譴。 13 佢等離開上主，去拜巴力神㧯亞斯她錄女神。 14 所以，上主向以色列人大發譴，將佢等交在四周圍敵人个手中，由在敵人搶佢等，害以色列人無法度再抵抗敵人。 15 以色列人無論出戰到㖠位，上主照自家所發个誓，逐擺做佢等个對敵，來攻擊佢等。佢等就堵到極大个苦難。 16 該時，上主就為以色列人興起士師來帶領佢等，解救佢等脫離該兜搶佢等人个手中。 17 總係以色列人民還係毋聽從佢等个士師，悖逆上主、行姦淫，去拜別个神明。這兜新个一代人當遽就毋跈祖先个腳步，毋遵行上主个命令。 18 逐擺上主興起士師給佢等，上主就㧯該士師共下，俾佢一生人救人民脫離仇敵。因為佢等受苦、受欺負到緊噌，上帝就憐憫佢等， 19 總係，該士師死掉以後，人民又倒轉去行壞事，過罪惡个生活，又比上代人還較厲害。佢等去拜別个神，服事佢等，盡硬頸，壞行為還係毋肯改。 20 所以上主又向以色列人發譴，講：「既然這人民違背𠊎命令佢等祖先遵守个約，毋聽從𠊎个話， 21 𠊎也毋將約書亞過身个時還留在這地个該兜外族人逐走。 22 𠊎愛用佢等來考驗以色列人民，看佢等係毋係像佢等祖先恁樣遵行𠊎个道路。」 23 所以，上主允准該兜民族留在這垤土地，無將佢等交給約書亞，乜無在約書亞過身後當遽就將佢等逐出去。