1該時，以色列無君王。但支族還係尋佢等做得安居个土地，因為佢等還吂在以色列逐支族中分到自家个土地。
2但支族人對全族選出五個勇士，派佢等離開瑣拉㧯以實陶，去打探土地。佢等來到以法蓮山區，住在米迦屋下。
3佢等聽到該後生利未人講話个口音就去問佢：「你在這位做麼介？麼人帶你到這位來？」
4佢應講：「係米迦安排个；佢請𠊎做佢个祭司，有月給給𠊎。」
5佢等對佢講：「請你求問上帝，𠊎等這擺出來打探會成功麼？」
6祭司應講：「你等做得平平安安去，上主在你等所行个路上看顧你等。」
7所以，這五儕離開。佢等來到拉億城，發現該位个人民無愁無慮，像西頓人共樣。這兜人和平、恬靜，無㧯外人相爭；土地出產又豐富。佢等離西頓人當遠，無㧯外人來往。
8這五儕轉到瑣拉㧯以實陶以後，佢等个同胞問佢等有麼介發現，
9佢等講：「大家來去，來去攻打拉億！𠊎等打探過該地方，確實係盡好。毋好在這位閒閒毋做事，遽遽來去啊！𠊎等去佔領啊！
10你等到該位就會發現人民全無防守；該係一垤當闊个土地，出產豐富，麼介都有。上帝已經將它交給你等了。」
11所以，但支族有六百儕武裝好，離開瑣拉㧯以實陶。
12佢等出發，在猶大个基列‧耶琳西片安營，所以該地方到這下還喊做但營。
13佢等繼續向前，到以法蓮山區米迦个屋下。
14該五個打探過拉億个人對同伴講：「你等知麼？這位有一間屋，底背有一領以弗得，一兜家中个神像，還有一隻雕刻个偶像㧯一隻鑄成个偶像。這下你等知𠊎等應該樣般做。」
15五個探仔就入到米迦屋下，問候該後生利未人。
16該時，但支族該六百個武裝好个士兵企在門口。
17當祭司㧯六百個武裝好个士兵還在門口个時，該五個探仔行入屋肚，拿走雕刻个偶像、以弗得、家中个神像㧯鑄成个偶像。
18佢等行入米迦屋肚拿走這兜東西个時，祭司問佢等：「你等做麼介啊？」
19佢等講：「噯，恬恬！毋好出聲！跈𠊎等共下來，做𠊎等个祭司㧯顧問。做以色列一支族个祭司敢毋係贏過做一個家族个祭司！」
20祭司聽到非常歡喜，就帶等以弗得、家中个神像㧯雕刻个偶像，跈佢等走。
21佢等轉身出發，俾子女、牛群㧯財物在頭前行。
22佢等離開米迦个屋下一站路以後，米迦正召集鄰舍出來追。佢等追到但族人，
23喊佢等。但族人轉身問米迦：「麼介事情？這群人來做麼介？」
24米迦應講：「你等搶走𠊎个祭司㧯𠊎所造个神像；𠊎無賸半項！你等還問𠊎麼介事情！」
25但族人對佢講：「你最好毋好加講；若係無，惹這兜人發譴，佢等會攻擊你，你㧯你全家會無命。」
26但族人繼續向前行；米迦看佢等比自家較強，就轉屋下去了。
29佢等用佢等祖先以色列个孻仔但个名，將拉億這座城个名改做但。
30但族人將偶像安好，派摩西个孫仔—革舜个孻仔約拿單做但支族个祭司。約拿單个子孫在該位做祭司直到但族人被人捉走。
31上帝个聖帳篷停留在示羅有幾久，米迦雕刻个偶像也留在但幾久。