Judges 14
1 有一日，參孫到亭拿；佢在該位看到一個非利士个細妹仔。
2 佢轉屋下㧯爺𡟓講：「𠊎在亭拿看到一個非利士个細妹仔，請將姖討轉來做𠊎个𡜵娘。」
3 佢个爺𡟓問佢：「你做麼介偏偏愛在無受割禮个非利士人中討𡜵娘呢？敢講在𠊎等自家个宗族抑係同胞當中無細妹仔係麼？」總係參孫對厥爸講：「𠊎當合意姖；請將姖討轉來。」
4 佢个爺𡟓卻毋知上主愛參孫恁樣做，因為上主尋機會愛攻擊非利士人。這時，非利士人統治以色列。
5 所以，參孫㧯厥爺𡟓到亭拿去。佢等經過該位个葡萄園个時，有一隻獅仔出來對佢吼吼滾。
6 上主个靈強烈臨到參孫，佢空手擘爛該隻獅仔，就像擘一隻細山羊。佢無將所做个事㧯爺𡟓講。
7 參孫去看該細妹仔，㧯姖講話；參孫當合意姖。
8 過幾日，參孫愛倒轉去討姖。半路，參孫走過去看㓾死个獅仔，無想到竟然在獅仔个屍體內發現一群蜂仔㧯蜂糖。
9 佢將蜂糖挖出來放在手項，緊行緊食。然後佢到爺𡟓該位，拿兜蜂糖給佢等，佢等也食；總係參孫無㧯佢等講蜂糖係對獅仔个屍體內挖出來个。
10 厥爸到該細妹仔屋下；參孫照該樣時後生人个習慣，在該位辦婚姻个筵席。
11 非利士人看到參孫，就派三十個人陪佢。
12 參孫對這三十個人講：「𠊎出一個鈴仔俾你等揣，若係你等能在這七日婚姻个筵席期間揣出來，𠊎就給你等逐儕一領上等麻紗衫㧯一身禮服；
13 若係你等揣毋出，你等逐儕愛給𠊎一領上等麻紗衫㧯一身禮服。」佢等講：「將鈴仔講出俾𠊎等聽啊！」
14 參孫對佢等講：食个對食者出；甜个對強者來。佢等想三日，全部揣毋出來。
15 第四日，佢等對參孫个𡜵娘講：「你愛用計嘐若老公將答案打探出來，若無，𠊎等愛放火燒若爸全家，連你也燒掉。你等請𠊎等來係愛搶𠊎等係麼？」
16 所以，參孫个𡜵娘在佢面前噭等講：「你惱𠊎！毋係正經惜𠊎！你出鈴仔給𠊎个鄉親，總係毋㧯𠊎講答案！」參孫應講：「𠊎連自家个爺𡟓乜無㧯佢等講，𠊎樣般做得㧯你講呢？」
17 厥𡜵娘在七日婚姻个筵席期間，逐日為這件事緊噭緊鬧。第七日，參孫被厥𡜵娘纏到無葛無煞，就將答案㧯姖講，姖就去㧯姖个鄉親講。
18 第七日，日頭還吂落山以前，城肚个人去見參孫，講：還有麼介比蜂糖較甜？還有麼介比獅仔較強？參孫應講：若毋係用𠊎个牛乸犁田，你等就揣毋出𠊎个鈴仔！
19 上主个靈強烈臨到參孫，佢就到亞實基倫，㓾掉三十個人，將佢等个禮服搶去給該兜揣出鈴仔个人。事後，佢非常發譴，就轉厥爸屋下去。
20 參孫个𡜵娘後來嫁給佢个且郎，就係參孫盡好个朋友。