Judges 11
1 基列人耶弗他係一個勇敢个戰士。厥爸係基列，總係厥姆係妓女。
2 基列㧯𡜵娘𫱔幾個孻仔；這兜孻仔長大以後，就將耶弗他逐出家門。佢等對佢講：「你做毋得承接𠊎等阿爸个家業，因為你係妓女𫱔个。」
3 恁樣耶弗他離開佢个兄弟，住在陀伯。在該位有一群鱸鰻仔聚集來跈佢。
4 一站時間以後，亞捫人攻打以色列人。
5 戰爭一開始，基列該兜長老就到陀伯請耶弗他轉來。
6 佢等對佢講：「請你做𠊎等个元帥，帶領𠊎等㧯亞捫人相㓾。」
7 耶弗他應講：「以前你等敢毋係惱𠊎、逐𠊎離開吾爸个屋下？這下你等堵到災難，樣般又來尋𠊎？」
8 基列該兜長老對耶弗他講：「這下𠊎等轉來尋你，愛你帶領𠊎等㧯亞捫人相㓾；恁樣，你就會做所有基列人民个領袖。」
9 耶弗他講：「你等愛𠊎轉去㧯亞捫人相㓾，若係上主使𠊎打贏，𠊎就做你等个領袖。」
10 佢等講：「上主為𠊎等做證，𠊎等一定會照你个話去做。」
11 所以耶弗他㧯基列該兜長老轉去；民眾就立佢做佢等个領袖㧯元帥。耶弗他在米斯巴將自家个話在上主面前講出來。
12 耶弗他派使者到亞捫王該位，講：「你㧯𠊎等鬥麼介？你做麼介侵佔𠊎等个土地？」
13 亞捫王應耶弗他派來个使者，講：「以色列人離開埃及以後佔領𠊎个土地，對亞嫩山壢到雅博山壢，直到約旦河。這下，你等愛乖乖將這垤地交還給𠊎。」
14 耶弗他又派使者去見亞捫王，
15 對佢講：「以色列人並無侵佔摩押人抑係亞捫人个土地。
16 其實，以色列人離開埃及以後，經過曠野到紅海，然後到加低斯。
17 該時，佢等派使者去請求以東王准佢等經過佢个土地，總係以東王毋准。佢等也派使者去請求摩押王准佢等經過佢个土地，佢也毋准。所以以色列人留在加低斯。
18 「後來，佢等向前行過曠野，𫟧過以東㧯摩押个土地，到摩押个東片。佢等在亞嫩山壢對面安營，並無過亞嫩山壢，因為該係摩押个邊界。
19 以色列人派使者去請求亞摩利人个王，就係希實本王西宏，准佢等經過佢个土地，到以色列人自家个所在。
20 總係西宏毋信服以色列人，毋准佢等經過佢个土地；佢反轉帶領全軍在雅雜安營，攻打以色列人。
21 「上主—以色列个上帝將西宏㧯佢个軍隊全部交在以色列人个手中；以色列人打贏亞摩利人，佔領佢等所有个土地。
22 佢等佔領亞摩利人所有个土地，對南部个亞嫩山壢到北部个雅博山壢，對東片个曠野到西片个約旦河。
23 「所以，係上主—以色列个上帝為佢个子民以色列逐走亞摩利人。你想愛搶轉這垤土地係麼？
24 你个神明基抹給你个土地，你做得佔等；總係上主—𠊎等上帝給𠊎等所有个，𠊎等愛守好。
25 你恅到你比摩押王西撥个孻仔巴勒還較強係麼？佢毋識惹以色列人戰爭，也毋識攻打𠊎等。
26 以色列佔有希實本㧯周圍个城鎮、亞羅珥㧯周圍个城鎮，並亞嫩山壢兩片所有个城市，已經有三百年了。在這站時間，你等做麼介毋收轉這兜地方呢？
27 𠊎無得罪你，你反轉來攻打𠊎，惹𠊎戰爭。上主係審判者；今晡日佢愛在以色列人㧯亞捫人中間判斷是非。」
28 總係，亞捫王毋搭耶弗他派个人轉給佢个話。
29 該時，上主个靈臨到耶弗他，佢就經過基列、瑪拿西，轉到基列个米斯巴，愛去亞捫人該位。
30 耶弗他向上主許願講：「若係你使𠊎打贏亞捫人，
31 𠊎得勝歸來个時，一定會將第一個對𠊎屋下出來迎接𠊎个人，做燒化祭獻給你。」
32 所以，耶弗他過去㧯亞捫人相㓾；上主使佢打贏。
33 佢攻打佢等，對亞羅珥到米匿一帶，遠遠到亞備勒‧基拉明，一共二十座城，㓾掉當多人。恁樣，亞捫人被以色列人征服了。
34 耶弗他轉到米斯巴自家屋下个時，佢个獨生女拿等鈴鼓跳舞出來迎接佢。
35 耶弗他看到姖，就傷心扯爛衫，講：「𠊎个妹仔啊，你會害𠊎傷心死哦！樣般係你呢？𠊎已經慎重向上主許願，做毋得收轉來了！」
36 佢个妹仔講：「阿爸！你已經向上主許願，就照你許个願對待𠊎好了，因為上主使你在仇敵亞捫人身上報仇。」
37 佢个妹仔要求佢講：「𠊎只求你一件事。請准𠊎離開屋下兩個月，毋好管𠊎；𠊎愛㧯朋友到山頂去，為𠊎無出嫁就死來哀傷。」
38 耶弗他准姖離開屋下兩個月，姖就㧯朋友到山頂去，在該位為姖還吂出嫁就死來哀傷。
39 兩個月後，姖轉到厥爸該位，耶弗他照佢向上主許个願還願。佢个妹仔死个時還係童貞女。後來，在以色列中有一個風俗：
40 以色列个婦女逐年愛離開屋下四日，去懷念基列人耶弗他个妹仔。