1在錫安歕羊角啊！在上帝个聖山大聲歕啊！猶大个人民啊，愛愊愊掣！上主个日仔會到了。
2該係烏暗、得人驚个日仔，係烏天暗地个日仔。有一大群个草蜢會來到，就像烏暗遮蓋山頭。以前毋識恁樣，以後也毋會再有。
3草蜢像火燒恁樣將所有个植物喫到淨淨。牠兜吂到以前土地像伊甸園，經過以後就變做荒廢个曠野；牠兜麼介乜無放過。
4牠兜看起來像馬仔，走起來像戰馬。
5牠兜在山頂跳个聲，就像戰車个聲，又像燥草𤏸火个聲。牠兜像軍隊排列好勢，像準備相㓾个大軍。
6牠兜一到，逐儕驚到會死，面色癧青。
7牠兜像勇士攻打，像戰士爬牆。牠兜勇敢向前，路線毋會偏走，
8也毋會尖來尖去。牠兜歸群通過防線，麼人也無辦法抵抗。
9牠兜攻入城肚，𨃟過城牆，爬上屋頂，像賊仔對窗門入來。
10牠兜一到，天搖地動，日月無光，星辰烏暗。
11係上主命令佢个軍隊。佢个軍力強大，召集个軍隊盡多。上主審判个日仔樣般得人驚！麼人㧡得起呢？
12上主講：就算這下，你等還係做得禁食、流目汁、盡噭，誠心悔改，歸向𠊎。
13你等毋好單淨扯爛衫；愛誠心悲傷悔改。愛歸向上主—你等个上帝！佢有恩典，充滿憐憫；佢無隨便發譴，有豐盛个慈愛；佢願意赦免，毋降災禍。
14可能上主—你等个上帝會改變主意，豐豐富富賜福給你等；該時你等就會有好向佢獻五榖、美酒。
15在錫安山歕羊角啊！宣佈禁食，舉行神聖个聚會！
16愛召集民眾，準備參加聖會。愛帶等老老嫩嫩，揇等孲𤘅仔，新婚夫婦也愛行出新娘間來。
17服事上主个祭司啊，你等愛在祭壇㧯聖殿个廊下中間哀求，講：上主啊，求你可憐你个子民。毋好俾列國藐視𠊎等；毋好俾佢等嘲謔𠊎等，講：「你等个上帝在㖠位？」
18上主會再一擺關心佢个土地，憐憫佢个子民。
19上主會應佢等講：𠊎愛賜給你等五榖、新酒、橄欖油；你等會得到滿足；𠊎毋會再俾列國藐視你等。
20𠊎愛使北方來个一大隊遠遠離開你等；𠊎愛將牠兜逐到荒掉个所在，前隊逐入死海，後隊逐入地中海；牠兜个屍體臭氣衝天，因為牠兜恁積惡。
21土地啊，毋使驚，愛歡喜快樂！因為有上主為你等做大事。
22走獸啊，毋使驚！因為野地个草靚起來了，樹仔結滿果子，無花果樹、葡萄樹也共樣結當多果子。
23錫安个人民啊，愛歡喜快樂！為上主—你等个上帝來歡喜。佢賜給你等及時个雨水，佢㧯以前共樣降下春雨㧯秋雨。
24禾埕會堆滿五榖；酒槽、油槽會有淰淰个新酒㧯橄欖油。
25𠊎有派大軍隊到你等中間，就係一大群个草蜢；牠兜恁多年食掉个農作物，𠊎愛補還你等。
26你等會有充足个食物，食到飽飽；你等愛讚美𠊎—上主、你等个上帝。𠊎為你等做奇妙个事；𠊎个子民永遠毋會再被人藐視。
27以色列啊，該時你等就會知𠊎在你等當中；𠊎係上主—你等个上帝；除了𠊎以外無別个神。𠊎个子民永遠毋會再被人藐視。
28日後，𠊎愛將𠊎个靈倒給所有个人：你等个子女會宣告𠊎个信息；你等个老人家會發奇妙个夢；你等个後生人會看到異象。
29該時，𠊎甚至愛將𠊎个靈倒出來給僕人㧯使女。
30𠊎愛在天頂地下顯神蹟，有血，有火，有大濛煙。
31日頭卻毋會發光；月光會像血恁紅。在上主偉大得人驚个日仔來到以前，這一切全部會發生。
32凡求喊上主聖名个人一定得救。就像上主所講：在錫安山，耶路撒冷會有逃走个人；在所賸个人當中會有𠊎所揀選个人。