Job 14
1 𠊎等出世就係軟弱个，過等短暫、苦難个生活。
2 𠊎等像花開恁樣、盡遽就謝掉；又像影仔恁樣、一下仔就走掉。
3 上帝啊，像𠊎恁樣个人，你還肯擘目看𠊎一下，帶𠊎入法院受審判麼？
4 屙糟人敢會出淨浰个東西？毋會，絕對無可能！
5 人个壽命早就註定好勢；佢在世个日仔係你決定。你定个界限無人能超過。
6 求你莫看等佢，莫管佢，俾佢像請來个工人做完佢个工。
7 樹仔若係被人斬下來，樹頭還有生芽爆筍个希望。
8 就算根在地泥下老掉，樹頭在泥肚燥掉，
9 水份充足，還係會生芽爆筍，像新種个樹苗爆筍一樣。
10 總係人一死，就係佢个結局；佢斷氣以後，愛到㖠位去呢？
11 就像湖無水，河壩水燥掉，
12 人一死，就毋會返生；天落下，佢也毋會䟘，直直睡，喊也毋會醒。
13 願你將𠊎囥在陰間，囥到你个怒氣消掉，正定日期來紀念𠊎。
14 人若死掉，還會返生嗎？𠊎就愛等到釋放該日，忍到災難个日仔過去。
15 到該時，你一喊，𠊎就會應你；你會歡喜你手所創造个𠊎。
16 該時，你會查看𠊎个腳步，總係你毋追究𠊎个過犯。
17 你會將𠊎个過失封入袋肚，將𠊎所有个罪惡全部遮蓋。
18 就像山一崩掉，巖石也徙走去，
19 流水磨損石頭，大水沖走土地；你也恁樣毀滅人个希望。
20 你永遠贏過人，使佢死掉，使佢面貌改變，將佢逐走。
21 厥孻仔得到好名聲，佢毋知；佢等降做卑微，佢也無感覺。
22 佢只知自家身項个痛苦；佢只有為自家怨嘆悲哀！