Job 1
1 有一個人安到約伯，住在烏斯地區；佢係一個好人，做人正直，敬畏上帝，遠離壞事。
2 佢有七個孻仔，三個妹仔。
3 佢有七千隻羊，三千隻駱駝，五百對牛，五百隻驢乸；還有盡多个僕人。在東方人當中，佢算係最發个。
4 約伯該兜孻仔常常輪流在自家屋下辦桌，也派人去請佢等个三個姊妹共下來啉食。
5 逐擺筵席个日期過後，約伯就打早䟘起來，為逐個子女獻燒化祭，喊佢等行潔淨个禮儀。佢常常恁樣做，因為佢想：「驚怕𠊎該兜子女有犯罪，在心肚咒罵上帝。」
6 有一日，天頂个眾神子來朝見上主，撒但也在佢等當中。
7 上主問撒但：「你對㖠位來啊？」撒但應講：「𠊎在地上逐位行來行去，然後轉到這位來。」
8 上主問撒但：「你有注意到𠊎个僕人約伯麼？世間無一儕像佢恁好：做人正直，又敬畏𠊎，遠離壞事。」
9 撒但應講：「約伯敬畏上帝，敢係無原因？
10 你敢毋係在四周圍保護佢、㧯佢个家，並佢所有个一切？你賜福給佢，使佢凡事順利；佢个頭牲多到滿遍係。
11 總係你若係出手，將佢所有个全部拿走，佢一定會當面咒罵你！」
12 上帝對撒但講：「好啊，佢所有个全部在你手中，總係不准你傷害佢本身。」撒但就對上主面前出去了。
13 有一日，約伯个子女全部在大哥屋下食飯啉酒，
14 有報信个走來㧯約伯講：「牛當犁田，驢在旁邊食草个時，
15 示巴人忽然間來攻擊，將頭牲全部搶走，㓾掉你所有个僕人，只有𠊎一儕逃走，來向你報信。」
16 佢還吂講煞，另外一個僕人走等來，講：「上帝對天頂降火下來，燒掉羊群㧯掌羊个，只有𠊎一儕逃走，來向你報信。」
17 佢還講等話个時，又有一個僕人走等來，講：「迦勒底人分三隊，忽然間攻擊𠊎等，將駱駝全部搶走，㓾掉所有个僕人，只有𠊎一儕逃走，來向你報信。」
18 佢還吂講煞，另外又有一個僕人走等來，講：「你該兜子女在大哥屋下食飯啉酒，
19 忽然間有大風對曠野吹來，將屋吹橫，屋肚个後生人全部磧死，只有𠊎一儕逃走，來向你報信。」
20 約伯就企起來，扯爛自家个外衫，剃掉頭那毛，伏在地上敬拜，
21 講：「𠊎赤身露體出母胎，也愛赤身露體倒轉去；賞賜个係上主，收轉去个也係上主。上主个名應當得到頌讚！」
22 雖然堵到這一切个事情，約伯並無犯罪，無怪怨上帝做毋著。