Jeremiah 44
1 有關該兜被人帶到埃及，住在密奪、答比匿、孟斐斯，㧯埃及南部該兜猶大人民个命運，上主向耶利米講話。
2 上主—萬軍个元帥、以色列个上帝恁樣講：「你等親目看到𠊎降在耶路撒冷㧯猶大逐隻城市个災難。直到今晡日，這兜城市還係荒涼，無人住；
3 因為城肚个人行為當壞，惹𠊎發譴。佢等燒香敬拜別个神明，就係佢等㧯你等、並你等个祖先全部毋認識个神明。
4 𠊎一擺又一擺派𠊎个僕人—該兜先知去警告你等做毋得做𠊎所惱這可惡个事，
5 總係你等毋聽，也毋搭𠊎，毋肯放掉向別个神明燒香个惡行。
6 所以，𠊎將𠊎个大受氣㧯大發譴倒在猶大逐隻城市㧯耶路撒冷个街巷，放火將它兜燒掉。到今晡日，這兜所在還係盡荒涼。
7 「𠊎—上主、萬軍个元帥、以色列个上帝愛問你等：這下，你等做麼介還做恁大个壞事來惹該得人驚个災禍呢？敢講你等愛害你等个男女、細人仔，㧯孲𤘅仔全部對猶大人中消滅，連一個也無留下來係麼？
8 你等做麼介在埃及—你等寄留个所在—還拜偶像、向別个神明燒香，來惹𠊎發譴呢？你等愛害死自家，俾世界各國將你等看做咒詛侮辱个對象係麼？
9 你等毋記得你等个祖先、猶大君王、王后、你等自家㧯𡜵娘在猶大地區㧯耶路撒冷个街巷所做个壞行為係麼？
10 直到今晡日，你等還無謙卑悔改，還係毋敬畏𠊎，毋遵行𠊎給你等㧯你等祖先个法律誡命。
11 「所以，𠊎—上主、萬軍个元帥、以色列个上帝愛向你等變面降災禍，來除滅猶大所有个人民。
12 強強走到埃及去住該兜賸到个猶大人，𠊎也愛將佢等全部消滅。佢等無論地位高低全部會在埃及戰死抑係餓死。佢等會被人咒罵、害人著驚、被人咒詛、羞辱。
13 𠊎識用戰爭、飢荒、㧯發瘟來責罰耶路撒冷，𠊎也愛照恁樣責罰該兜到埃及去住个人。
14 該兜賸到个猶大人，走到埃及去住个，無一儕做得走閃。無人有可能生生轉到猶大，就係佢等盡想愛轉去住个故鄉。除了少數个難民逃走，無人有可能轉去。」
15 該時，知自家个𡜵娘向別个神明燒過香个該兜男人，㧯一大群企在該位个婦人家，包含住在埃及南部个猶大人，應耶利米講：
16 「𠊎等毋聽你奉上主个名向𠊎等講个話。
17 𠊎等一定愛照𠊎等所許个願去做。以前，𠊎等㧯𠊎等个祖先，𠊎等个君王㧯官員，在猶大逐隻城市㧯耶路撒冷街巷向天后女神燒香獻酒；這下𠊎等愛照恁樣做。該時，𠊎等食得飽、享福氣、無災禍。
18 總係，自從𠊎等停止向天后女神燒香獻酒，𠊎等反轉樣樣欠缺；𠊎等个同胞毋係戰死，就係餓死。」
19 該兜婦人家又講：「𠊎等个老公也贊成𠊎等照天后女神个形像做餅，去向姖燒香獻酒。」
20 所以，耶利米對所有講這種話應佢个男女講：
21 「你等㧯你等个祖先、君王、官員、並全國人民在猶大逐隻城市㧯耶路撒冷街巷燒過香，你等恅到上主毋知抑係毋記得係麼？
22 今晡日，你等个土地荒廢，無人住，成做人著驚、咒詛个對象，這係因為上主無辦法忍受你等所做可惡个壞事。
23 你等今晡日堵到這種災難，係因為你等向別个神明燒香，毋聽從上主个話，毋遵守上主个法律、誡命㧯規矩，得罪佢。」
24 耶利米又對所有个男女講：「你等住在埃及个猶大人啊，愛聽上主个話。
25 上主—萬軍个元帥、以色列个上帝恁樣講：你等講，你等㧯你等个𡜵娘全部識向天后女神許願，愛燒香獻酒給姖，你等堅持愛照自家所發个誓去做。若係恁樣，做你等照自家所發个誓去還你等个願啊！
26 總係所有住在埃及个猶大人啊，愛聽上主个話。看啊，𠊎—上主指等𠊎至高个聖名發誓：在埃及全地，𠊎毋會再准任何猶大人奉𠊎个名發誓講：『𠊎指等永生个上主發誓！』
27 𠊎一定愛使你等堵到災禍，得毋到福氣。所有在埃及地个猶大人毋係戰死，就係餓死，直到全部消滅。
28 總係，你等當中有少數人還能生生對埃及轉到猶大去。恁樣，這兜住在埃及賸到个猶大人就會知，到底係𠊎个話抑係佢等个話正著。
29 𠊎—上主愛給你等一隻記號，俾你等知𠊎愛在這所在責罰你等，𠊎宣佈愛消滅你等个話一定實現。
30 𠊎識將猶大王西底家交給想愛收佢命个敵人，就係巴比倫王尼布甲尼撒；𠊎也愛照恁樣將埃及王合弗拉交給想愛收厥性命个敵人。𠊎—上主恁樣宣佈了。」