Jeremiah 42
1 後來，所有个軍官—包含加利亞个孻仔約哈難㧯何沙雅个孻仔耶撒利雅—並所有个人民對最細到最大共下行前來，
2 對先知耶利米講：「請答應𠊎等个要求！代𠊎等向上主—你个上帝祈求。求你為𠊎這兜賸到个人祈禱。你親目看到，以前𠊎等有盡多人，這下賸無幾多儕。
3 求上主—你个上帝指示𠊎等應該行个路，應該做个事。」
4 先知耶利米應講：「好！𠊎知了，𠊎答應你等个要求。𠊎會向上主—你等个上帝祈禱。無論上主講麼介，𠊎會全無保留㧯你等講。」
5 所以佢等又對耶利米講：「若係𠊎等毋遵守上主—你个上帝差派你給𠊎等一切个命令，願上主做誠實可靠个證人來對付𠊎等。
6 𠊎等這下請你向上主—𠊎等个上帝祈求；無論佢个話係福氣抑係災禍，𠊎等一定愛聽從。𠊎等若係聽從上主—𠊎等个上帝，全部定著會順利。」
7 十日以後，上主㧯耶利米講話。
8 所以佢召集加利亞个孻仔約哈難㧯所有跈佢个軍官，並所有个人民，對最細到最大全部來，
9 對佢等講：「上主—以色列个上帝，就係你等喊𠊎在佢面前為你等祈求个上帝，恁樣講：
10 『若係你等決心繼續住在這所在，𠊎會建立你等，毋會拆掉你等；𠊎會栽培你等，毋會挷掉你等；因為𠊎為到向你等降个災難，回心轉意了。
11 你等毋使驚巴比倫王。毋好驚佢！因為𠊎㧯你等同在，𠊎會救你等脫離佢个手。
12 𠊎既然憐憫你等，𠊎也會喊佢憐憫你等，俾你等轉到故鄉。』
13 「總係，你等毋聽從上主—你等上帝个話，自家決定毋留在這所在，
14 講：『𠊎等無愛留在這所在！𠊎等愛到埃及去。在該位，𠊎等毋會堵到戰爭，毋會聽到羊角个聲，也毋會因為無食物來餓肚笥；𠊎等愛住在該位。』
15 你等賸到个猶大人民既然講這種話，上主—萬軍个元帥、以色列个上帝恁樣講：『若係你等堅持一定愛去埃及，住在該位，
16 你等所驚个戰爭會在埃及追到你等；你等所驚个飢荒會跈等來；你等會死在埃及。
17 所有決定到埃及去住个人，若毋係戰死，餓死，就係發瘟來死。無人能繼續生存，無人閃得開𠊎愛降在佢等身上个災難。』
18 「上主—萬軍个元帥、以色列个上帝恁樣講：『以前𠊎將𠊎个受氣㧯大發譴倒在耶路撒冷人民身上；若係你等到埃及去，𠊎也愛將𠊎个發譴倒在你等身上。你等會成做該位人所惱、所驚、咒詛、㧯羞辱个對象。你等絕對毋會再看到這所在。』
19 「上主識吩咐你這兜賸到个猶大人民講：『毋好到埃及去。』𠊎這下嚴嚴警告你等：
20 你等犯了致命个錯誤。你等假意請𠊎代你等向上主—𠊎等个上帝祈禱，並答應愛遵行佢一切个命令。
21 今晡日𠊎㧯你等講上主—你等个上帝愛𠊎㧯你等講个一切話，總係你等毋肯聽從佢。
22 這下你等愛確實知：你等會在自家決定愛去个所在受到戰爭、飢荒、抑係發瘟來死。」