1西底家做猶大王个第十年，也係尼布甲尼撒王統治巴比倫个第十八年，上主向耶利米講話。
2該時，巴比倫王个軍隊堵好當圍攻耶路撒冷，先知耶利米關在猶大王宮禁衛隊个拘留所。
3猶大王西底家將佢關起來，責備佢講：「你做麼介預言，上主恁樣講：『𠊎愛將這城交在巴比倫王手中，俾佢佔領。
4猶大王西底家無辦法對巴比倫人个手中走掉；一定會將佢交在巴比倫王个手中，使佢面對面㧯尼布甲尼撒講話。
5西底家會被人帶到巴比倫，留在該位，直到𠊎責罰佢个時。若係你等㧯巴比倫人相㓾，你等也無辦法打贏。𠊎—上主恁樣宣佈了。』」
6上主㧯𠊎講，
7吾叔沙龍个孻仔哈拿默會來看𠊎，愛𠊎將佢在亞拿突城該垤田地買下來；因為𠊎係佢个至親，𠊎有贖轉來个義務㧯買个權利。
8斷真，就像上主講个，吾叔个孻仔哈拿默來到禁衛隊个拘留所，㧯𠊎講：「𠊎在便雅憫地區亞拿突該垤地，求你買下來，因為你有繼承㧯贖轉來个權利。」恁樣，𠊎就知這件事就係上主講个話。
9𠊎就向吾叔个孻仔哈拿默買亞拿突城該垤地，秤十七垤銀仔給佢。
10𠊎請人做證，簽地契、封好、秤銀仔。
11然後，𠊎將有標題㧯條件个地契，一份封好，一份打開，
12在吾叔个孻仔哈拿默㧯簽名在地契頂高个證人、並禁衛隊拘留所底背所有猶大人面前，交給瑪西雅个孫仔尼利亞个孻仔巴錄。
13𠊎在佢等面前向巴錄講：
14「上主—萬軍个元帥、以色列个上帝命令你將這兩份地契，封好个㧯打開个全部囥在缶罌肚，好保存久久。
15因為上主—萬軍个元帥、以色列个上帝恁樣講過，人會重新在這所在買屋、買田㧯葡萄園。」
16𠊎將地契交給尼利亞个孻仔巴錄以後，就向上主祈禱講：
17「至高个上主啊，你用自家个大能大力創造天地；對你來講，無做毋到个事。
18你識用不變个慈愛痛惜千萬人；總係你也因為阿爸所犯个罪報應子女。你係全能、至大个上帝；你个名係上主—萬軍个元帥。
19你个計劃偉大，你个行事大有權能；你目瞋瞋看人个一舉一動，照逐儕所行所做報應佢。
20你識在埃及行神蹟奇事；你也在以色列㧯列國當中行神蹟奇事直到今晡日。所以，你在世間有大名聲。
21你用神蹟奇事使𠊎等个敵人驚到愊愊掣，又用大能大力帶你个子民以色列出埃及。
22你遵守自家向佢等祖先所立个約，將這流乳㧯蜜當肥个土地賜給佢等。
23總係佢等一入來，得到這垤土地以後，就毋順從你个命令，毋遵行你个教訓。你命令佢等做个，佢等全部毋做，所以你使佢等受這一切个災難。
24「看啊，巴比倫人已經起好攻城个土堆，開始攻打。這城會因為戰爭、飢荒、㧯發瘟來陷落在敵人手中。你所講个已經實現，你也親目看到了。
25至高个上主啊，雖然巴比倫人差毋多會攻下這城，你還係命令𠊎在證人面前用銀仔來買該垤田地。」
26所以上主對𠊎講：
27「𠊎係上主，係全人類个上帝。對𠊎來講敢有做毋到个事？
28𠊎愛將這城交在巴比倫王尼布甲尼撒㧯佢帶領个軍隊手中，佢等會佔領這城。
29攻城个巴比倫人會入城，放火燒這城，連以色列人在屋頂向巴力燒過香、向神明獻過酒來惹𠊎發譴該兜屋舍，全部會燒掉。
30以色列人㧯猶大人從細一直做𠊎看做壞个事；佢等當會惹𠊎發譴。
31對耶路撒冷建城以來，人民也一直惹𠊎受氣、大發譴。𠊎已經決定毀滅這城；
32因為以色列㧯猶大个人民攏總做當邪惡个事惹𠊎發譴，連佢等个君王、領袖、祭司、先知也共樣；特別係猶大人㧯耶路撒冷人。
33佢等悖逆𠊎，變面毋認𠊎；𠊎早就教了又教，總係佢等毋聽，毋肯受教。
34佢等將𠊎當惱个偶像放在敬拜𠊎个聖殿肚，來打垃圾聖殿。
35佢等在欣嫩子山壢為巴力造祭壇，拿自家个子女燒給邪神摩洛。𠊎並無命令佢等做這兜事，也無想到佢等會做這恁邪惡个事，害猶大人民犯罪。」
36上主—以色列个上帝對𠊎恁樣講：「耶利米啊，你等講戰爭、飢荒、㧯發瘟會害這城陷在巴比倫王手中。這下，你注意聽𠊎講。
37𠊎識在發閼、受氣、㧯大發譴中將𠊎个子民逐到各國去。這下𠊎愛對該兜所在將佢等聚集起來，𢱋佢等轉來，在這所在安居樂業。
38該時，佢等愛做𠊎个子民，𠊎愛做佢等个上帝。
39𠊎愛賜給佢等專心一意，一生人敬畏𠊎，使佢自家㧯子孫得到幸福。
40𠊎愛㧯佢等立永遠个約，一直賜福給佢等，使佢等專心敬畏𠊎，毋會再離開𠊎。
41𠊎會歡歡喜喜賜福給佢等，實實在在、全心全意將佢等在這垤土地上釘根。」
42上主恁樣講：「𠊎識使這子民受這一切个大災難，𠊎也愛照𠊎个應許將所有幸福賜給佢等。
43你等講，這垤土地會荒掉，無人，也無動物；已經交在巴比倫人手中。總係𠊎講，將來會有人重新在這所在買田地。
44人愛在便雅憫地區逐所在、耶路撒冷四周圍个城市、猶大逐城、山區个鄉鎮、西片高原个村莊、㧯猶大南部逐城市，用銀仔買賣田地，簽地契，揝印仔封地契，請人做證。𠊎愛使𠊎个子民重新得到佢等个產業。𠊎—上主恁樣宣佈了。」