Jeremiah 27
1 約西亞个孻仔西底家做王統治猶大初期，耶利米對上主領受這个信息：
2 上主吩咐𠊎用皮帶㧯樹仔做一隻軛，掛在頸筋項。
3 接等，上主吩咐𠊎，通過該兜來耶路撒冷訪問西底家王个大使，將軛个信息轉給以東王、摩押王、亞捫王、泰爾王，㧯西頓王。
4 上主吩咐𠊎命令逐個大使將佢个話㧯佢等个主人講：上主—萬軍个元帥、以色列个上帝恁樣講：
5 「𠊎用大能大力个手創造大地，還有地上个人類㧯所有个動物。𠊎愛將地交給𠊎看做最妥當个人。
6 這下𠊎愛親身將這兜國家交給𠊎个僕人巴比倫王尼布甲尼撒，俾佢統治，連野獸也交給佢管理。
7 所有个國家全部愛事奉佢㧯佢个孻仔、孫仔，直到佢个帝國衰敗。該時，佢會事奉列國㧯該兜大君王。
8 「無論㖠邦㖠國，凡係毋肯服事巴比倫王尼布甲尼撒，毋肯揹佢加在佢等頸筋項个軛，𠊎就愛用戰爭、飢荒、㧯發瘟刑罰該國，直到𠊎使尼布甲尼撒將該國完全消滅。
9 論到你等，你等做毋得聽信你等个先知、卜卦个、解夢个、算命个、㧯行邪術个話。這兜人喊你等毋好服事巴比倫王，
10 其實佢等向你等講个係假預言，會害你等被人捉走，遠離家鄉；𠊎會逐你等走；你等會被人消滅。
11 總係，無論㖠國肯揹巴比倫王加給它个軛，肯服從佢，𠊎就俾該國个人民平安住在本地，耕種自家个土地。𠊎—上主恁樣宣佈了。」
12 𠊎也向猶大王西底家講共樣个話：「你等愛揹巴比倫王加給你等个軛，服事佢㧯佢个人民；恁樣，你等正有可能生存下去。
13 你㧯你个人民樣愛使惹起戰爭、飢荒、㧯發瘟來死？上主明明講過，㖠國毋肯服事巴比倫王，該國家就會堵到這兜災難。
14 你等毋好聽信勸你等毋使服事巴比倫王个該兜先知。佢等係欺騙你等个。
15 上主親身講過，佢並無派佢等，係佢等借佢个名講假預言。若係你等聽信佢等，上主就逐走你等；你等㧯騙你等个先知全部會滅亡。」
16 然後，𠊎去㧯祭司並人民講上主个話：「你等毋好聽信講聖殿个寶物無幾久會對巴比倫搬轉來个該兜先知。佢等係向你等講假預言。
17 你等毋好信佢等个話！你等愛服事巴比倫王正會生存下去！這城樣好變做荒埔呢？
18 若係佢等係真先知，有𠊎个信息，佢等就應當向𠊎—上主、萬軍个元帥祈求，求𠊎毋好俾人將留在聖殿、猶大王宮、㧯耶路撒冷个寶物運到巴比倫去。」
21 有關留在上主个聖殿肚、猶大王个王宮肚、㧯耶路撒冷城肚个寶物，上主—萬軍个元帥、以色列个上帝恁樣講：
22 「這兜東西全部會被人搬到巴比倫，留在該位，直到𠊎將它兜收轉來个時。該時，𠊎愛將它兜運轉來，放轉原來个地方。𠊎—上主恁樣宣佈了。」