Bible

1 巴比倫王尼布甲尼撒對耶路撒冷將約雅敬个孻仔猶大王約雅斤、猶大个官員、打鐵師傅㧯工人捉到巴比倫去。這事以後，上主俾𠊎看到聖殿頭前擺等兩籃無花果。 2 第一籃裝滿新出个好無花果；還有一籃裝滿食毋得个壞無花果。 3 上主問𠊎：「耶利米啊，你看到麼介？」𠊎應講：「無花果。好个當好，壞个當壞，壞到食毋得。」 4 接等上主對𠊎講： 5 「𠊎—上主、以色列个上帝愛將該兜被人捉去个猶大人民，就係𠊎逐佢等離開這地方到巴比倫去个人，看做好个無花果，愛好好款待佢等。 6 𠊎愛特別看顧佢等，帶佢等轉到這垤土地。𠊎愛重建佢等，毋係拆掉佢等；𠊎愛栽培佢等，毋係挷掉佢等。 7 𠊎愛使佢等个心會了解，知𠊎正係上主。佢等愛做𠊎个子民，𠊎愛做佢等个上帝，因為佢等定著會一心一意歸向𠊎。 8 「論到猶大王西底家，還有佢左右个官員㧯賸到个耶路撒冷人，無論係留在這位，抑係住在埃及个，𠊎—上主愛將佢等看做壞到食毋得个無花果。 9 𠊎愛使佢等堵到大災難，俾世界各國人越看越著驚。在𠊎逐佢等去个所在，別人會羞辱、恥笑、嘲謔、咒詛佢等。 10 在𠊎賜給佢等㧯佢等祖先个土地，𠊎愛用戰爭、飢荒、㧯發瘟來消滅佢等。」