Isaiah 66
1 上主恁樣講：「天係𠊎个寶座，地係𠊎个踏凳。你等愛在㖠位為𠊎起聖殿呢？㖠位愛做𠊎休息个所在呢？
2 𠊎親手創造宇宙萬物，俾一切存在！𠊎看顧謙卑㧯真心悔改个人，也保護敬畏聽從𠊎話个人。
3 「總係該㓾牛仔做牲儀、又去㓾人个；該獻細羊仔、又㓾狗仔來獻祭个；該獻素祭、又獻豬血个；該燒乳香、又去拜偶像个；佢等選自家个路，心肚歡喜所做積惡个事。
4 所以，𠊎愛特別降下佢等最驚个災禍。因為𠊎喊佢等，佢等毋應；𠊎㧯佢等講話，佢等毋聽；𠊎看做壞个事，佢等反轉去行；𠊎所惱个事，佢等偏偏當好。」
5 敬畏聽從上主个人啊，你等愛聽佢个話。佢講：「因為𠊎个名个緣故，你等个同胞當中有兜人來恨你等，逐你等走。佢等笑你等講：『請你等个上主顯出佢个偉大，使𠊎等看出你等會有幾歡喜！』總係佢等反轉會盡見笑！
6 聽啊！城肚有吵鬧个聲音，係對聖殿發出來个，係上主報應仇敵个聲音！
7 「𠊎个聖城就像一個吂經過陣痛忽然就𫱔孻仔个婦女；
8 你等敢識聽過抑係看過恁奇妙个事？有㖠個國家係在一日內、一下仔就𫱔出來？總係錫安像吂痛到就𫱔子女恁樣建立起來了。
9 𠊎敢會俾姖產期已經到還𫱔毋出來？」上主恁樣講了。
10 你等愛㧯耶路撒冷共下歡喜快樂！所有惜這城个人應該為姖歡喜！你等識為姖悲傷个人，這下愛㧯姖共下歡喜快樂！
11 你等愛歡喜享受姖个繁榮，就像孲𤘅仔在阿姆安慰个胸前食乳食到飽飽。
12 上主恁樣講：「𠊎愛使姖得到平安像長流水；得到萬國个財富像大水流到姖該位。你等會像一個阿姆餵食乳个細人仔，被阿姆揇在懷中，放在膝頭頂來惜。
13 𠊎愛在耶路撒冷安慰你等，像阿姆安慰自家个細人仔。
14 你等看到這所有个事發生个時，你等个心會歡喜快樂；你等个骨頭會得到滋潤，像嫩草靚起來。該時，你等就會知𠊎—上主親身幫助𠊎該兜僕人；總係𠊎愛對𠊎个敵人發譴。」
15 看哪，上主在火中降臨；佢該兜戰車像龍捲風，帶來佢个大發譴，用大火責罰佢等。
16 上主愛用火㧯劍責罰所有犯罪个人；被上主㓾死个人盡多。
17 上主講：「該兜自家講係分別為聖、潔淨自家，排等到『神聖花園』去食豬肉、老鼠肉、㧯其他無淨浰食物个人，佢等个末日到了。
18 𠊎知佢等个行為㧯想法。𠊎愛來召集萬國萬族；佢等聚集前來个時，就會看到𠊎个榮光。
19 𠊎愛在佢等當中行神蹟，責罰佢等。「總係，𠊎愛對賸下來个人當中，派人到逐國㧯遠遠个海島去；該兜所在自從毋識有人聽過𠊎个名，無人看過𠊎个榮光。𠊎愛派賸下來个人到他施、利比亞、也有當會射箭个呂底亞、土巴、㧯希臘去。佢等會在列國中宣揚𠊎个榮光。
20 轉來个時，佢等會對逐國帶轉你等个同胞，做獻給𠊎个禮物。佢等帶轉來个人騎等馬仔、驢仔、駱駝，坐戰車㧯轎仔到𠊎个聖山—耶路撒冷，就像以色列人拿淨浰个器皿到𠊎个聖殿去獻素祭共樣。
21 𠊎愛設立佢等當中有兜人做祭司㧯利未人。」
22 上主講：「就像𠊎創造个新天新地永久長存，你等个子孫㧯你等个名也會長長久久流傳。
23 逐隻月初一㧯安息日，普天下个人全部會到耶路撒冷來敬拜𠊎。」上主恁樣宣佈了。
24 「佢等出去个時，會看到該兜悖逆𠊎个人个屍體。食佢等屍體个蟲仔永遠毋會死；燒佢等个火永遠毋會烏掉；普天下个人全部會惱佢等。」