Bible

1 上主啊，願你俾天裂開，親身降臨人間！高山看到你就會愊愊掣， 2 像火燒燥柴，像烈火將水煮滾。求你向你个敵人顯明你个名，使萬國在你面前愊愊掣！ 3 你以前識降臨，做恁得人驚个事，係𠊎等毋識想到个；高山看到你就愊愊掣。 4 自古以來無人看過，也無人聽過像你恁樣个神，毋識有其他个神為服事佢个人做過恁大个事。 5 歡喜行善、記得你教訓个，這種人正係你愛親近个人；總係，𠊎等犯罪惹你發譴已經盡久了，𠊎等樣有可能得救呢？ 6 𠊎等攏總有罪，連𠊎等个好行為也像屙糟个衫褲。因為𠊎等个罪，𠊎等像燥掉个樹葉被風吹散。 7 無人向你祈禱；無人向你求幫助。因為𠊎等个罪，你揞面毋搭𠊎等；你將𠊎等㧒掉。 8 總係上主啊，你係𠊎等个阿爸。𠊎等像泥，你係燒缶師傅；𠊎等全部係你親手造个。 9 上主啊，求你毋好向𠊎等大發譴；求你毋好永遠記得𠊎等个罪。𠊎等全部係你个子民；求你看顧𠊎等。 10 你神聖个城—錫安已經變做曠野；耶路撒冷已經成做荒埔。 11 該最神聖，最靚个聖殿—𠊎等个祖先識在該位頌讚你个所在，已經被人燒掉了。𠊎等所寶貝个土地全部荒掉了。 12 上主啊，發生這兜事情，你還忍得住麼？你還恬恬、毋幫助𠊎等係麼？你給𠊎等个苦難樣恁多呢？