Bible

1 𠊎愛講話鼓勵錫安，𠊎為到耶路撒冷一定毋會恬恬，直到它个公義像日頭出來，它个救恩像火把𤏸當猛。 2 耶路撒冷啊，萬國全部會看到你个得勝；所有个君王會看到你个榮光。你會有一個新名，係上主親口安个。 3 你會成做上主手中盡靚个冕旒，在上帝手中成做王帽。 4 人毋會再講你係「被人㧒掉个」，你个土地也毋會再被人喊做「荒埔」。你會被人喊做「上主所歡喜个」；你个土地會成做「有歸屬个」。因為上主歡喜你；你个土地定著會歸屬佢。 5 就像細孻仔討細妹仔，該造就你个愛討你。就像新郎中意佢个新娘，你个上帝也中意你。 6 耶路撒冷啊，在你个城牆頂，𠊎有派守望个人。佢等毋會日夜恬恬無出聲；佢等毋肯休息、緊提醒上主佢所應許个。 7 佢等毋俾上主歇睏，直到佢重建耶路撒冷，使耶路撒冷在全地受人稱讚。 8 上主已經伸出佢个正手，憑佢个大能發誓講：𠊎毋會再將你个農作物給敵人做糧食；外族人毋會再啉你勞碌得來个新酒。 9 你等耕種，會有好收成，收割个會有好食，並讚美上主。你等種葡萄，也會有好收成，在𠊎聖殿个庭院肚會有酒好啉。 10 你等愛遽遽出城門，出去為轉來个人民開路；煞猛將地坉高，煞猛整大路，將石頭清掉，為萬國个人民插大旗。 11 看啊，上主識向普天下宣佈：你等愛㧯錫安个人民講：看啊，你个拯救者來囉！看啊，佢愛將佢所拯救个子民𢱋轉來。 12 佢等會被人喊做「上帝神聖个子民」，喊做「上主所救贖个子民」。耶路撒冷會被人安到「上帝所關心个城」，安到「上帝無豁掉个城」。