Bible

1 該兜到埃及去求幫助个人會堵到災難了！佢等倚靠埃及強大个軍力—戰馬、戰車㧯騎兵，總係毋倚靠以色列神聖个上帝，毋求上主个幫助。 2 其實，上帝大有智慧；佢愛責罰作惡个人㧯該兜𢯭手作惡个人。佢決定愛降災禍，絕對毋會改變。 3 埃及人並毋係神；佢等係人定定！佢等个馬仔係血肉个，並毋係靈！上主一伸手，強國也會跌倒，它所幫助个弱國也會橫掉；它兜會共下滅亡。 4 上主恁樣對𠊎講：「就像獅仔抑係細獅仔捉到獵物，由在歸群掌羊个樣般大聲咄，牠兜毋會著驚也毋會縮縮。共樣，𠊎—上主、萬軍个元帥愛降臨、保護錫安山；無人做得阻擋。 5 就像鳥仔打開翼胛保護鳥子，𠊎—上主、萬軍个元帥也愛保護耶路撒冷，愛保護它，拯救它，𨃟過它，毋俾它受傷害。」 6 以色列人啊，你等識完全悖逆上主。這下愛歸向佢！ 7 到該時，你等逐儕會㧹掉你等親手用金銀所鑄造該兜邪惡个偶像。 8 上主講：「亞述人會在刀下橫掉，並毋係人个刀仔；有刀仔愛將佢等吞滅，也毋係人个刀仔。亞述人會因為這個刀仔逃走；佢等个後生人會被人捉去做奴才。 9 佢等个皇帝會驚到逃走；該兜軍官會慌張撤退，連軍旗也豁掉。」上主恁樣宣佈了。佢有火在錫安，有爐在耶路撒冷。