Bible

1 亞述皇帝撒珥根命令佢个元帥攻打非利士个亞實突城，佔領該城。 2 這件事發生前三年，上主識命令亞摩斯个孻仔以賽亞脫掉佢身項个麻衫㧯腳項个鞋。佢聽從上主个話，打赤膊，打赤腳行路。 3 亞實突被人佔領个時，上主講：「𠊎个僕人以賽亞已經打赤膊、打赤腳行三年久；這就係共樣个事愛發生在埃及㧯古實个兆頭。 4 亞述皇帝愛對這兩個國家當中將人民捉走，剝光佢等个衫褲；該時，無論老人細子，全部愛打赤膊，打赤腳，露出下身，使埃及當見笑。 5 該兜信賴古實㧯誇口埃及个人會失志絕望。 6 該時，住在非利士海滣个人會講：『看啊，𠊎等所倚靠、愛幫助𠊎等抵抗亞述皇帝个人樣般係恁樣定定！𠊎等敢有辦法逃走呢？』」