Bible

1 下背係有關大馬士革个信息。上主講：「大馬士革將來毋會再係一個城市；它會變做荒涼个土堆。 2 敘利亞所有个城市會永遠荒掉，成做牛羊休息个所在，毋會有人來逐牠兜。 3 以色列會失掉保障；大馬士革會喪失獨立。該兜賸到个敘利亞人會像以色列人共樣受盡羞辱。𠊎—上主、萬軍个元帥恁樣宣佈了。」 4 上主講：「到該日，雅各後代个榮光就會弱掉去；佢等會對富足變做貧窮。 5 以色列將來會像一垤收割過个田地，光光像利乏音山壢正收割過个田地。 6 以色列人中只有少數人還有命；佢等就像被人摘過个橄欖樹，樹尾只賸兩三粒，下背个樹桍也賸四、五粒个橄欖。𠊎—上主、以色列个上帝恁樣宣佈了。」 7 到該日，人愛轉向創造佢等个主，全心仰望以色列神聖个上帝。 8 佢等毋會再倚賴自家个手所造个祭壇，也毋信任自家个手指所做个，就係該兜亞舍拉女神个柱仔㧯香壇。 9 到該日，防備堅固个城市會被人廢掉，成做荒埔，像希未人㧯亞摩利人在以色列人面前逃走㧒掉个城共樣。 10 以色列人民啊，你等已經毋記得該拯救你等、像堅固个巖石保護你等个上帝；你等反轉為到愛拜外國个偶像，建設神聖花園。 11 就算你等栽種該日它兜就爆芽開花，也無可能有收成。你等只有憂愁絕望痛苦。 12 唉！萬民个吵聲像海水恁大聲，像海浪恁吵。 13 列國像波浪攻打過來；總係上帝大聲咄它兜，使它兜退到遠遠，像山頂風中个泥粉，像暴風中个燥草。 14 暗晡頭它兜使人著驚，第二朝晨就無蹤無影。這係搶劫𠊎等土地个人所受到个命運！