Isaiah 1
1 烏西雅、約坦、亞哈斯㧯希西家做猶大王个時，亞摩斯个孻仔以賽亞看到有關猶大㧯耶路撒冷个異象。
2 上主講：「天哪，地啊，全部來聽！𠊎親自扶養𢱋大个子女反轉悖逆𠊎。
3 牛認識主人，驢仔知主人餵牠个槽；總係𠊎个子民以色列毋認識𠊎，毋曉得想！」
4 嗐！犯罪个國家，罪惡當重个人民，做壞事个種類，敗壞个子女！你等拒絕上主，藐視以色列神聖个上帝；你等㧯佢緊來緊生疏。
5 你等做麼介緊悖逆呢？你等所受个責罰還毋罅麼？以色列啊，你等已經歸頭那著傷，滿心衰弱。
6 對頭到腳，無一垤好，歸身烏青，全部糜糜。無人㧯你等洗淨，包好，也無人為你等膏藥仔。
7 你等个土地荒廢；城市被火燒掉。你等看等你等个田地被外族人侵佔、破壞，已經荒淨淨。
8 只有賸到鍚安城，連它也被人圍困，像葡萄園肚个茅寮，像瓜田中个草寮，無麼介安全。
9 若毋係上主—萬軍个元帥為𠊎等留兜人个性命，𠊎等早就像所多瑪㧯蛾摩拉恁樣毀滅了。
10 耶路撒冷啊，你等个官長㧯人民就像所多瑪㧯蛾摩拉个人恁壞。你等愛聽上主个話，愛留心聽𠊎等上帝个教示。
11 上主講：「你等獻恁多个祭物對𠊎有麼介利益呢？你等所獻燒化祭个羊㧯肥頭牲个油，𠊎已經罅了。你等所獻个牛、羊㧯山羊个血，𠊎全無歡喜。
12 你等敬拜𠊎个時，麼人㧯你等討這兜頭牲呢？麼人喊你等恁樣做來蹧踏𠊎个聖殿呢？
13 毋好再獻該兜全無意思个祭物！𠊎無愛再鼻你等所燒个香；𠊎當惱你等初一、安息日㧯宗教个聚會，一片犯罪，一片聚會，𠊎實在無辦法忍受。
14 𠊎當惱你等初一个祭物㧯各種宗教个節期；它兜成做𠊎个重擔，𠊎無愛再揹了。
15 「你等擎手祈禱，𠊎無愛看；無論你等祈禱幾多，𠊎全部無愛聽；因為你等雙手血漬漬。
16 你等愛將自家洗淨浰，毋好俾𠊎再看到你等犯罪，毋好再做壞事！
17 你等愛學習做好事，伸張正義，幫助被人欺負个，為孤兒伸冤，為寡婦辯護。」
18 上主講：「來啊，𠊎等來理論！雖然你等个罪像硃紅，會變像雪恁白。雖然你等个罪像胭脂，會變像羊毛恁白。
19 若係你等願意服從𠊎，就能食地上美好个產物。
20 若係你等拒絕𠊎，悖逆𠊎，就愛被刀劍㓾掉。𠊎係上主，𠊎恁樣宣佈。」
21 這城本來係忠貞个，樣會變做妓女！頭擺住等个全部係公平正直个人民，這下只有兇手。
22 耶路撒冷啊，你識像純銀，這下變做雜質；你識像美酒，總係這下摻到水。
23 你个官長悖逆𠊎，㧯賊仔共黨，逐個好拿不義个紅包，硬討禮物；總係毋保護孤兒，也毋代寡婦伸冤。
24 因為恁樣，至高个上主—萬軍个元帥、以色列大能个上帝宣佈講：「嗐！𠊎愛向𠊎个對頭報復，向𠊎个仇敵報仇！
25 𠊎愛對付你等：𠊎愛用火鎔化你等、煉淨你等，愛除掉你等所有个雜質。
26 𠊎愛重新設立你等个審判官㧯顧問，像頭擺共樣。恁樣，耶路撒冷就做得稱做正義㧯忠實个城。」
27 錫安會因為上主公平个審判得到拯救；城肚悔改个人會因為佢个公義得到拯救。
28 總係犯罪㧯悖逆个人佢愛打碎；拒絕上主个人佢愛消滅。
29 你這兜選地來做神聖花園、又將中意个橡樹準神明拜个人，一定會堵到見笑、受侮辱。
30 你等會像葉仔燥掉个橡樹，像無水个花園。
31 有權勢个人會像鋸屎，佢等所做个像火花；全部會燒到淨淨，無人能救佢等。