Bible

1 上主講：以色列還細个時，𠊎就惜佢；𠊎將𠊎个孻仔，對埃及帶出來。 2 總係，𠊎越喊佢，佢越離開𠊎。𠊎个子民向巴力獻祭；佢等向偶像燒香。 3 係𠊎教以色列人行路，用雙手將佢等揇在胸前，醫好佢等个病，總係佢等完全毋承認。 4 𠊎用慈悲个索仔、痛惜个帶仔牽等佢等；𠊎將佢等肩頭頂个牛軛拿下來，又跍下來餵佢等。 5 「因為以色列人毋肯悔改歸向𠊎，佢等敢毋會轉去埃及；亞述人敢毋會做佢等个王？ 6 戰爭愛臨到佢等个城市，破壞佢等个城門，消滅佢等，因為佢等自作聰明。 7 𠊎个子民佻佻愛悖逆𠊎；到尾，佢等愛為到加在肩頭个牛軛緊噌，總係無人能為佢等解開來。 8 以色列人啊，𠊎樣拌得豁掉你等？𠊎樣會㧒掉你等？𠊎會像消滅押瑪恁樣毀滅你等麼？𠊎敢會像對待洗扁恁樣對待你等？毋會！𠊎已經回心轉意，因為𠊎非常痛惜你等。 9 𠊎毋會在大發譴之下責罰你等；𠊎毋會反過來消滅以色列。因為𠊎係上帝，毋係世間人。𠊎係在你等當中个聖者；𠊎毋會在大發譴之下審判你等。 10 「𠊎愛像獅仔大聲吼，𠊎个子民就會來跈𠊎。𠊎一下吼，佢等會對西方遽遽轉來。 11 佢等會像鳥仔，當遽就對埃及飛轉來，又像月鴿仔，對亞述飛轉來。𠊎愛帶𠊎个子民重新轉佢等个家鄉。𠊎—上主恁樣宣佈了。」 12 上主講：「以色列人用花撩詭詐欺騙𠊎；猶大人也悖逆𠊎—信實、神聖个上帝。」