Hebrews 4
1 既然上帝應許愛俾𠊎等享受佢所賜个安息，𠊎等就應該存敬畏个心，免得有人被上帝看做係失敗个，無法度享受安息。
2 𠊎等也有聽到福音，像佢等一樣；總係佢等聽了福音，並無得到利益，因為佢等無用信心來領受所聽到个。
3 𠊎等有好享受上帝个安息，因為𠊎等信；像上帝所講：𠊎在怒氣中發誓：「佢等絕對做毋得入去該地方享受𠊎所賜个安息！」事實上，上帝創造个工作早就完成了，佢還恁樣講。
4 因為關係第七日，聖經有一節恁樣講：「在第七日，上帝就停佢一切个工作來安息。」
5 關係這件事，聖經又講：「佢等絕對做毋得入去該地方享受𠊎所賜个安息！」
6 先前該兜聽到福音个人無享受到安息，因為佢等毋信；這就係講，還有其他个人會有好享受佢个安息。
7 所以，上帝另外定一日，稱做「今晡日」。多多年後，佢通過大衛个話，照聖經所記載，講：今晡日，你等若聽到上帝个聲，就毋好恁硬頸。
8 若係約書亞已經帶領人民進入上帝所應許个安息，上帝後來就毋會再提這另外个一日。
9 對恁樣來看，還有另外一種个「安息日」為上帝子民个安息保留等。
10 因為，人若係領受上帝所應許个安息，就會對停下佢个工作來得到安息，像上帝停佢个工作來安息一樣。
11 所以，𠊎等應該盡力打拚來進入這種个安息，免得有人像該兜毋服從个人恁樣跌倒。
12 上帝个話係有生命、有效力个。它比兩邊利个劍還較利；連靈㧯魂，關節㧯骨髓，攏總刺得入。它能判斷人心中个思想㧯念頭。
13 受造个萬物無一樣有可能囥等毋給上帝知；在佢眼中，一切事情攏總係清清楚楚个。有一日，𠊎等愛對佢交帳。
14 恁樣，𠊎等應該堅持𠊎等所告白个信仰。因為𠊎等有一個偉大个大祭司，就係上帝个孻仔耶穌；佢已經升到上帝个面前。
15 𠊎等个大祭司毋係毋會同情𠊎等个軟弱；顛倒，𠊎等个大祭司經歷過𠊎等所堵到各方面个試探，總係佢無犯罪。
16 所以，𠊎等應該大膽來到上帝施恩个寶座前，好領受慈愛㧯恩典，做𠊎等及時个幫助。