Hebrews 12
1 既然𠊎等有恁多見證人，像雲圍等𠊎等，就應該放掉各種个重擔㧯纏等𠊎等个罪，忍耐到底來走擺在𠊎等頭前个路程。
2 𠊎等愛注目看耶穌，因為佢係𠊎等信心个開創者㧯完成者。為到擺在佢頭前个喜樂，佢看輕侮辱，忍受十字架个痛苦；這下，佢坐在上帝寶座个右片。
3 你等愛好好想看仔，佢係樣般忍受罪人个怨恨；恁樣，你等正毋會冷心失志。
4 你等同罪惡戰鬥，還吂拚到生死个關頭。
5 上帝樣般勸勉你等，像勸子女一樣，敢講你等毋記得了係麼？佢講：𠊎个孻仔啊，毋好看輕主个管教，被佢責備个時節，毋好失志；
6 因為主管教佢所惜个人，鞭打每一個佢所認个子女。
7 你等愛忍受苦難像係阿爸个管教，因為這係表示上帝對待你等像子女一樣。敢有毋使受厥爸管教个子女嗎？
8 你等若無像其他个子女恁樣受管教，你等就毋係子女，係私生子。
9 肉身个阿爸識管教𠊎等，𠊎等還係尊敬佢等。恁樣，對靈性个阿爸，𠊎等敢毋係還較愛順服佢，正會得到生命嗎？
10 肉身个阿爸照自家看做著个，暫時管教𠊎等；總係，上帝个管教係為到𠊎等个利益，愛使𠊎等有份佢个聖潔。
11 人受管教个時，一定會傷心，毋爽快；總係後來，該兜對管教來受操練个人就會結平安个果子，過正直个生活。
12 所以，你等手軟腳攋个，愛紮磳起來！
13 愛一直行在筆直个路上，使瘸掉个腳正毋會脫腕，反轉會得到醫治。
14 你等愛盡力㧯眾人和好，也愛追求聖潔；無聖潔，無一個人能見到主。
15 愛謹慎！免得有人失掉上帝个恩典；免得有人像有毒个根大起來，害到盡多人，使佢等變做污穢；
16 免得有人犯淫亂，抑係像以掃恁看重世俗，為到一碗食物連長子个名份也拿來賣掉。
17 你等知，後來佢想愛得到阿爸个祝福，總係受拒絕；佢雖然流目汁，迫切懇求，還係尋毋到挽回个辦法。
18 你等毋係像該兜以色列人恁樣，來到該摸得到个西奈山；在該位有火焰、烏雲、黑暗、暴風、
19 歕羊角个聲，㧯講話个聲。人民聽到這個話，就要求毋好再對佢等講話；
20 因為佢等當毋起該命令，講：「摸這山个，就算係頭牲也愛用石頭㧹死。」
21 所看到个非常得人驚，連摩西也講：「𠊎驚到愊愊掣！」
22 總係，你等係來到錫安山；這係永生上帝个城，係天頂个耶路撒冷，有千千萬萬个天使。
23 你等係來到上帝眾長子歡喜聚會个場所；這兜長子个名已經記在天頂。你等係來到審判萬民个上帝面前，係來到成做完全个義人个靈魂該所在。
24 你等係來到新約个中保耶穌面前，係來到拂血个所在；這個血贏過亞伯个血所表現个。
25 所以，你等愛謹慎，毋好拒絕該向你等講話个。該兜拒絕該在地上將神聖个真道傳給佢等个一位，都無法度脫罪；若係𠊎等拒絕該對天頂向𠊎等講話个，𠊎等就還較無可能脫罪噢！
26 該時，佢个聲搖動地，總係這下，佢應許講：「還有一擺，𠊎毋單淨愛搖動地，連天也愛搖動。」
27 「還有一擺」這句話明顯表示受造之物會受搖動到徙走，俾該兜毋會搖動个留下來。
28 恁樣，既然𠊎等承受該毋會搖動个國，𠊎等就應該感恩。𠊎等愛照上帝所歡喜个，用虔誠敬畏个心來事奉佢，
29 因為𠊎等个上帝係烈火。