Bible

1 在古時代，上帝盡多擺用各種方法，通過眾先知對𠊎等个祖先講話； 2 總係，在這末後个日仔，佢通過佢个孻仔對𠊎等講話。這個孻仔，上帝識通過佢創造宇宙，又設立佢來承受萬有。 3 佢係上帝个榮耀所發出个光，係上帝本質个真相；佢用佢大能个話托等萬有。佢洗淨人類个罪惡以後，就坐在天頂至大權能者个右片。 4 這孻仔个地位遠遠超過眾天使，像上帝所賜佢个名比天使个名較尊貴。 5 上帝從來毋識對任何一個天使講過：你係𠊎个孻仔；今晡日𠊎做你个阿爸。佢也毋識對任何一個天使講：𠊎愛做佢个阿爸；佢愛做𠊎个孻仔。 6 上帝愛差派佢个長子來世間个時節，佢講：上帝个眾天使攏總愛拜佢。 7 關係天使，佢講：上帝使佢个使者成做風，使佢个奴僕成做火焰。 8 總係，講到孻仔，佢就講：上帝啊，你个寶座萬代長存！你用公平掌權。 9 你歡喜公義，怨恨罪惡；所以上帝—你个上帝選立你，使你充滿喜樂，贏過同伴。 10 佢又講：主啊，起頭你定大地个根基；諸天也係你親手創造个。 11 天地會消滅，總係你永遠長存；天地會像衫褲爛掉恁樣消失。 12 你愛將天地捲起來，像捲外袍，它兜會像衫褲漸漸歿掉；總係你永遠毋會改變，你个壽年無窮無盡。 13 上帝從來毋識對任何一個天使講過：你坐在𠊎个右片，等𠊎使你个仇敵伏在你个腳下。 14 恁樣，天使係麼介呢？佢等係事奉上帝个靈；上帝派佢等來幫助該兜愛承受救恩个人。