Genesis 40
1 這事以後，埃及王个酒政㧯膳長得罪王；
2 埃及王非常發譴，
3 下令將這兩個官員關入侍衛長府內个監獄，就係關約瑟个所在。
4 侍衛長派約瑟服事這兩個官員；佢等在監獄肚關盡久。
5 有一暗晡，埃及王个酒政㧯膳長在監獄肚，逐儕發一個夢，兩儕个夢無共樣。
6 第二日朝晨，約瑟來看佢等，看到佢等心神無定，
7 就問佢等：「你等今晡日做麼介恁憂愁呢？」
8 佢等應講：「𠊎等逐儕發一個夢，總係無人能代𠊎等解夢。」約瑟講：「解夢个能力敢毋係上帝所賜个！請將你等个夢㧯𠊎講。」
9 酒政就將佢个夢㧯約瑟講：「𠊎發夢看到𠊎面前有一頭葡萄樹，
10 樹頂分做三枝桍。樹一爆芽就開花，葡萄跈等也熟了。
11 𠊎手項拿等王个酒杯；𠊎摘葡萄，將葡萄汁撚落酒杯，將酒杯㨮給王。」
12 約瑟對佢講：「這夢个意思係恁樣：三枝桍代表三日。
13 三日後，王會放你出去，赦免你，恢復你原來个職位；你會同頭擺做酒政一樣，㧯王㨮酒。
14 總係你一切順利个時，請你記得𠊎，好款待𠊎，在王面前代𠊎講好話，幫助𠊎出這個監獄。
15 𠊎實在係在希伯來人个地方被人捉來个；𠊎在埃及也無做過麼介壞事，無應該被人關起來。」
16 膳長看約瑟將酒政个夢解釋恁好，就對約瑟講：「𠊎也發一個夢，在夢中看到自家頭那頂放等三隻裝滿麵包个籃仔。
17 最頂高个籃仔裝滿愛給王食个各種麵包；有鳥仔來食這兜麵包。」
18 約瑟講：「這夢个意思係恁樣：三隻籃仔代表三日。
19 三日後，王會斬你个頭那，將你吊在樹𣎴頂，飛鳥愛來食你个肉。」
20 再過三日係王个生日。該日，王為佢所有个官員擺筵席，將酒政㧯膳長放出來，帶到官員面前。
21 佢恢復酒政个職位，使佢又將酒杯㨮給王；
22 總係王將膳長吊死。這兜事完全照約瑟个解釋實現了。
23 總係酒政卻毋記得約瑟，將佢毋記得淨淨。