Genesis 34
1 有一日，雅各㧯麗亞𫱔个妹仔底拿出去訪問該地方个細妹仔。
2 該地个族長希未人哈抹有一個孻仔安到示劍；佢看到底拿，就拉姖來強姦。
3 示劍因為底拿恁靚，盡愛姖，就對姖講好話，想得到姖个歡喜。
4 示劍對厥爸哈抹求講：「想辦法俾𠊎討這細妹仔做𡜵娘。」
5 雅各聽到示劍侮辱厥妹仔底拿。該時，佢該兜孻仔在野外掌頭牲，所以佢恬恬，等佢等轉來。
6 示劍个阿爸哈抹來見雅各，代厥孻仔提親。
7 雅各該兜孻仔已經聽到消息，對野外轉來。佢等非常痛心、就大發譴，因為示劍強姦雅各个妹仔係一件侮辱以色列家个事，這本來係做毋得个事。
8 哈抹㧯佢等講：「吾孻仔示劍當合意你等屋下个妹仔，請你等准吾孻仔㧯姖結婚。
9 𠊎等來同意兩族通婚：𠊎等討你等个細妹仔，你等也討𠊎等个細妹仔。
10 恁樣你等做得㧯𠊎等共下住在這個所在，隨意尋地方住、自由做生理、買產業。」
11 接等，示劍自家也對底拿个阿爸㧯該兜兄弟講：「求你等給𠊎面子；你等要求麼介，𠊎全部答應。
12 你等若肯𠊎㧯這細妹仔結婚，你等愛麼介聘金㧯禮物，𠊎全部會給你等。」
13 雅各該兜孻仔，因為示劍侮辱佢等个老妹底拿，就用詭詐个話應示劍㧯厥爸哈抹，
14 對佢等講：「𠊎等做毋得將老妹嫁給無受割禮个人，這對𠊎等來講係非常見笑个事。
15 若係你等接受這個條件，𠊎等就同意你等个要求：你等愛像𠊎等共樣，逐個細孻仔全部愛受割禮；
16 恁樣，𠊎等就同意㧯你等通婚，住在你等當中，成做一個民族。
17 若係你等毋接受𠊎等个條件受割禮，𠊎等就愛將老妹帶走，離開這位。」
18 哈抹㧯厥孻仔示劍認為這個條件公當。
19 該後生人係厥屋下最受看重个人；因為佢愛雅各个妹仔，黏時就照所提个條件去做。
20 恁樣，哈抹㧯厥孻仔示劍到城門聚會个地方，對佢等本城个人講：
21 「這兜人對𠊎等盡和睦，做得俾佢等住這位、做生理；這地恁闊，罅擺容納佢等。𠊎等做得討佢等个細妹仔，佢等也做得討𠊎等个細妹仔。
22 總係，這兜人提出一個條件：就係𠊎等个細孻仔，一定愛像佢等个細孻仔共樣受割禮，佢等正肯㧯𠊎等共下住，成做一個民族。
23 𠊎等同意好麼！俾佢等住在𠊎等當中。恁樣佢等个頭牲㧯一切財產敢毋係全部變做𠊎等个嗎？」
24 全城个人攏總贊成哈抹㧯厥孻仔示劍个建議；恁樣，全城个細孻仔就攏總受割禮。
25 到第三日，當地个細孻仔因為受割禮還當痛个時，雅各个兩個孻仔，就係底拿个親阿哥西緬㧯利未，恬恬帶等刀劍，在佢等全無提防个時，入去城肚，將當地所有个細孻仔㓾淨淨，
26 又用刀劍㓾掉哈抹㧯佢个孻仔示劍，然後將底拿對示劍个屋下帶走。
27 雅各其他个孻仔也來到該位，將該城搶到淨淨，來為佢等个老妹所受个侮辱報仇。
28 佢等搶走羊群、牛群、驢仔，並城肚㧯田園所有个東西。
29 佢等搶走一切貴重个東西，將所有个婦女㧯細人仔捉走，甚至搬走屋肚所有个東西。
30 雅各對西緬㧯利未講：「你等會害死𠊎！從今以後，迦南人、比利洗人，㧯這地方其他个民族全部會恨𠊎。𠊎等人數無多，若係佢等聯合起來攻擊𠊎，𠊎㧯全家穩死了。」
31 總係佢等應講：「佢㖠做得對𠊎等个老妹像對娼妓一樣啊！」