Galatians 6
1 兄弟姊妹啊，若係有人一時做毋著事，你等屬靈个人就愛用溫和个方法來挽回佢。你等自家也愛細膩，驚怕也受誘惑。
2 愛分擔重擔，恁樣就係遵行基督个命令。
3 自認有才調，事實上無半撇个人，佢係騙自家定定。
4 逐儕應該反省本身个行為；若係有好行為，佢做得為自家來感覺光榮，總係無需要同別人个成就比較。
5 因為逐儕愛㧡自家个擔頭。
6 在基督个真道上接受教導个人，應該愛供給教佢个先生，同佢分享一切个好東西。
7 你等毋好騙自家；無人能騙上帝。人種麼介，就會收麼介。
8 為到滿足自家个情慾來委種个，佢就會對情慾收成滅亡；為到愛得到聖靈个歡喜來委種个，佢就會對聖靈收成永遠个生命。
9 𠊎等行善，毋好失志；若無灰心，時間一到，就會有收成。
10 所以，無論麼介時節，一有機會就愛為眾人行善，對該兜在信仰上同屬一家个人還較愛恁樣。
11 你等看，這兜大隻个字係𠊎親筆為你等寫个！
12 該兜盡好用外表个事情來展㧯誇口，就係迫你等接受割禮个人。佢等恁樣做，惟一个原因就係驚為到基督个十字架受迫害。
13 事實上，該兜接受割禮个人，連佢等自家乜無遵守法律；佢等迫你等受割禮，勉強你等降服外表个儀式，目的係愛用恁樣來做佢等个誇口。
14 若係𠊎，𠊎一定無誇口別个，𠊎只有誇口𠊎等主耶穌基督个十字架；因為通過這十字架，對𠊎个觀點來看，世界已經釘死在十字架頂；對這世界來講，𠊎也已經釘死在十字架頂了。
15 受割禮抑係無受割禮攏總無麼介關係；重要个係𠊎等愛成做新創造个人。
16 願一切遵照這原則个人，㧯所有屬上帝个真以色列民，全部得到平安㧯憐憫！
17 從今以後，毋好再加添𠊎个麻煩；因為𠊎身上个傷跡已經證明𠊎係耶穌个奴僕。
18 兄弟姊妹啊，願𠊎等主耶穌基督个恩典常在你等心內！阿愐。