1這事以後，有兜以色列人个領袖來㧯𠊎講：「以色列人民、祭司、利未人並無㧯該兜鄰國个迦南人、赫人、比利洗人、耶布斯人、亞捫人、摩押人、埃及人、亞摩利人隔離。佢等學該兜人，做共樣邪惡个事。
2佢等為自家㧯子孫討外國个細妹仔，將上帝聖潔个子民打垃圾；領袖㧯官長就係帶頭个罪人。」
3𠊎一聽到這事，就扯爛衫㧯外袍，又挷頭那毛㧯鬍鬚，憂傷痛苦坐等。
4𠊎呆呆坐等，直到臨暗仔獻祭个時。因為以色列个上帝識講，佢愛對付流亡轉來个人所犯个罪，所有聽到這話就著驚憂傷个人全部聚集到𠊎面前來。
5臨暗仔獻祭个時，𠊎對憂傷中䟘起來，還係著等扯爛个衫㧯外袍跪落去，伸出雙手向上主—𠊎个上帝祈禱。
6𠊎講：「上帝啊，𠊎真見笑澇潰，毋敢在你面前昂起頭來。𠊎等个罪惡堆起來高過頭那，𠊎等个罪過堵天。
7對𠊎等祖先个時代直到這下，𠊎等个罪惡盡重。因為𠊎等个罪過，𠊎等㧯𠊎等个王，並該兜祭司全部落在外邦君王个手中。𠊎等被人㓾、被人搶、被人捉走，受盡侮辱，到今晡日還係恁樣。
8「上主—𠊎等个上帝識施恩給𠊎等，使𠊎等賸到个人民暫時毋使做奴才，俾𠊎等安穩住在這神聖个所在。𠊎等个上帝使𠊎等重見光明，脫離捆綁，給𠊎等還有一些仔希望。
9𠊎等本來係奴才，總係𠊎等个上帝無俾𠊎等一直做奴才。佢使波斯个皇帝好款待𠊎等，俾𠊎等重新䟘起來，又重建上帝个聖殿，整好毀壞个所在，使𠊎等在猶大㧯耶路撒冷有城牆來保護。
10「總係，𠊎等个上帝啊，這下這事既然發生，𠊎等還有麼介好講呢？𠊎等違背
11你通過你个僕人—該兜先知所給𠊎等个命令。佢等識㧯𠊎等講，𠊎等愛去佔領个所在係屙糟个土地；因為當地个人污穢邪惡个行為使全地充滿垃圾。
12佢等又㧯𠊎等講：若係𠊎等愛強盛，享受這垤土地个出產，永遠傳給子孫，𠊎等絕對做毋得㧯該兜人通婚，做毋得幫助佢等繁榮興旺。
13𠊎等个上帝啊，就算臨到𠊎等个責罰全部係因為𠊎等个罪惡過犯，𠊎等知，你對𠊎等个責罰還係少過𠊎等所應得个；你還係留𠊎這兜人个生命。
14𠊎等樣般做得再違背你个命令，㧯該兜邪惡个人通婚呢？若係𠊎等恁樣做，你一定會發譴，消滅𠊎等，使𠊎等無留一儕。
15上主—以色列个上帝啊，你係公義个；總係你還留𠊎等罪人个生命。𠊎等向你承認𠊎等个罪；𠊎等無資格來企在你个面前。」