Bible

1 上主㧯𠊎講話； 2 佢講：「人子啊，你愛責備以色列个統治者，向佢等講預言。你愛㧯佢等講，𠊎—至高个上主對佢等恁樣講：以色列个牧人啊，你等會堵到災難了！你等只有顧自家，牧人敢毋係愛牧養羊群嗎？ 3 你等啉羊乳，著羊毛衫，㓾盡肥个羊，食羊肉，總係從來毋去照顧羊群。 4 軟弱个，你等無畜到強壯；發病个，你等無醫治；受傷个，你等無包好勢；迷路个，你等無𢱋轉來；失落个，你等無去尋轉來。你等反轉用暴力壓制牠兜。 5 因為無牧人，羊群就分散，成做野獸个食物； 6 致到𠊎个羊群流浪在山中，又在高山頂，分散全地，無人照顧，也無人去尋。 7 「所以，牧人啊，你等愛聽𠊎—上主个話： 8 𠊎—至高个上主指等𠊎永遠个生命發誓：𠊎个羊群因為無牧人就被野獸吞食掉。𠊎个牧人毋去尋；佢等只有顧自家，毋牧養𠊎个羊群。 9 所以，你這兜牧人啊，聽𠊎講！ 10 𠊎—至高个上主愛㧯你等做對敵。𠊎愛收轉𠊎个羊群，毋准你等再做牠兜个牧人，也毋俾你等繼續只有顧自家。𠊎愛對你等个嘴孔救𠊎个羊，毋准你等食牠兜个肉。」 11 「𠊎—至高个上主恁樣講，𠊎愛親自將𠊎个羊群尋轉來。 12 牧人樣般尋轉失散个羊，𠊎也愛照樣尋𠊎个羊轉來。牠兜在烏天暗地、多災多難个時，被人逐到各所在，𠊎愛對該兜所在將牠兜救轉來。 13 𠊎愛𢱋牠兜離開外國，將牠兜集合起來，帶轉故鄉。𠊎愛𢱋牠兜轉到以色列个山頂㧯溪水邊，並在一切盡肥个草場牧養牠兜。 14 𠊎愛在以色列山頂个草原畜牠兜，俾牠兜在山頂㧯該兜又肥又靚个草場安心食草。 15 𠊎愛親自做𠊎羊群个牧人，為牠兜尋做得安心歇睏个所在。𠊎—至高个上主恁樣宣佈了。 16 「失落个，𠊎愛尋轉來；迷路个，𠊎愛𢱋轉來；受傷个，𠊎愛包好勢；發病个，𠊎愛醫好來。總係該兜肥壯个，𠊎愛毀滅，因為𠊎愛照公道牧養羊群。 17 「講到𠊎个羊群，𠊎—至高个上主恁樣講：𠊎愛在羊㧯羊中間、綿羊牯㧯山羊牯中間施行審判。 18 你等當中有兜食上等个草料還毋知足，反轉蹧踏食賸个草！你啉清水，轉過來又用腳將啉賸个水來摝渾渾。 19 𠊎其他个羊仔高不將食你等蹧踏過个草，啉你等摝渾个水。 20 「所以，𠊎—至高个上主恁樣講：𠊎愛在你這兜肥壯㧯瘦弱个羊中間主持公道。 21 你等用肩頭㩳軟弱个、尖牠兜，用角鬥牠兜，將牠兜逐散到各所在。 22 總係，𠊎愛救𠊎个羊，毋俾牠兜再被人壓制。𠊎愛在羊㧯羊中間施行審判。 23 𠊎愛為佢等設立一個像𠊎僕人大衛恁樣个君王，佢會做佢等个牧人，牧養佢等。 24 𠊎—上主愛做佢等个上帝；像𠊎个僕人大衛恁樣个君王會來統治佢等。𠊎—上主恁樣宣佈了。 25 𠊎愛㧯佢等立平安个約。𠊎愛除掉國內兇惡个野獸，使𠊎个羊安全在曠野食草，在樹林中歇睏。 26 「𠊎愛賜福給佢等，俾佢等在𠊎聖山个四周圍安居樂業。𠊎愛照時節落水，也愛降下福氣像甘霖。 27 田園个果樹會結滿果子，地會出產五榖；逐儕會有好安心住在自家个土地上。𠊎斬斷𠊎子民个鎖鍊，對統治佢等个人手中釋放佢等个時，佢等就會知𠊎係上主。 28 列國毋會再搶劫佢等；野獸也毋會再吞食佢等。佢等會有好安居樂業，毋會再受到恐嚇。 29 𠊎愛使佢等个土地變做當有名、好耕種个所在；佢等个國內毋會再有飢荒。列國毋會再侮辱佢等。 30 以色列人會知𠊎—上主、佢等个上帝㧯佢等共下；佢等就係𠊎个子民。𠊎—至高个上主恁樣宣佈了。 31 「你等係𠊎个羊，係𠊎草場上个羊群。你等係𠊎个子民，𠊎係你等个上帝。」至高个上主恁樣宣佈了。