Ezekiel 29
1 𠊎等被人捉去个第十年十月十二，上主㧯𠊎講話。
2 佢講：「人子啊，你愛向埃及王講預言；你愛責備佢㧯埃及全國。
3 愛㧯佢講，至高个上主恁樣講：埃及王啊，𠊎愛㧯你做對敵！你像囥在河壩肚个大鱷魚。你講尼羅河係你个，係你造个。
4 𠊎愛用鉤仔鉤你个頦鰓，使河壩肚个魚黏等你个鱗甲，然後將你拉出尼羅河，連該兜黏等你个魚也共下拉出來。
5 𠊎愛將你㧯魚全部豁到曠野。你个屍體會橫在荒地，無人埋葬。𠊎愛用你个屍體餵飛鳥走獸。
6 恁樣，所有个埃及人就會知𠊎係上主。」上主講：「埃及人啊，以色列人倚靠你等；其實，你等係一支蘆竹做个拄杖定定。
7 佢等一拄等你等，你等就斷掉，又刺傷佢等个脇下，佢等个腰骨也閃到。
8 所以，𠊎—至高个上主恁樣講：𠊎愛使你等堵到戰爭，人㧯頭牲全部被人㓾淨淨。
9 埃及个土地會荒廢。恁樣，你等就會知𠊎係上主。「因為你講尼羅河係你个，係你造个，
10 𠊎愛㧯你並你个尼羅河做對敵。𠊎愛使埃及个土地，對北部个密奪城，到南部个色弗尼城，一直到古實交界，全部荒廢，
11 看毋到人，也看毋到野獸經過。四十年久，埃及會無人住。
12 𠊎愛使埃及成做全世界最荒涼个所在；四十年久，埃及个城鎮會比任何荒涼个城還較淒涼。𠊎愛使埃及人變做難民，逃難到各國，住在外國人當中。」
13 至高个上主恁樣講：「四十年後，𠊎愛將埃及人對分散个各國集合起來，
14 𢱋佢等轉到埃及南部个家鄉。在該位，佢等愛組織一個細國家，
15 係世界上最細个王國；它絕對無辦法再統治別个國家。𠊎愛使它降做全無地位个細國，毋使想愛統治別个國家。
16 以色列人絕對毋會再倚靠它个支持。埃及个結局使以色列人想到倚靠人係樣般大个錯誤。恁樣，佢等就會知𠊎係至高个上主。」
17 𠊎等被人捉去个第二十七年正月初一，上主㧯𠊎講話。
18 佢講：「人子啊，巴比倫王尼布甲尼撒攻打泰爾。佢使軍隊揹重擔，致到頭那毛𢫫淨淨，肩頭溜皮，總係王㧯軍隊全部無得到麼介工錢。
19 所以，𠊎—至高个上主恁樣講：𠊎愛將埃及个土地交給巴比倫王尼布甲尼撒。佢會盡命搶埃及，將帶得走个攏總搶走；這兜戰利品做得做佢軍隊个工錢。
20 𠊎將埃及交給佢做工錢，因為佢个軍隊代𠊎做事。𠊎—至高个上主恁樣宣佈了。
21 「該時，𠊎愛使以色列強壯起來；𠊎愛使你—以西結在逐儕全部聽得到个所在講話。恁樣，佢等就會知𠊎係上主。」