Exodus 8
1 上主對摩西講：「你去見埃及王，對佢講：『上主恁樣講：放𠊎个子民走，俾佢等去敬拜𠊎。
2 若係你還係毋肯，𠊎愛責罰你个國家，使全國滿地有蛙仔。
3 尼羅河肚會有拶拶个蛙仔；蛙仔對河壩肚愛跳出來，進入你个王宮、你个間肚，跳上你个眠床，到你官員个屋下，到你人民个屋下，甚至跳入灶下，跳入鑊頭肚，
4 也愛跳到你身項，你官員个身項，㧯你人民个身項。』」
5 上主對摩西講：「你愛㧯亞倫講，喊佢手擎佢个柺棍仔，伸向河壩、運河、湖㧯陂塘，喊蛙仔出來，使全國滿地係蛙仔。」
6 所以亞倫伸出佢个柺棍仔，指等埃及个水，蛙仔就跳出來，滿地拶拶。
7 總係行邪術个也變法術，喊蛙仔跳到地面上。
8 國王喊摩西㧯亞倫來，講：「請你等求上主逐走該兜蛙仔離開𠊎㧯𠊎个子民，𠊎就放你个人民走，俾佢等去向上主獻祭。」
9 摩西應講：「𠊎願意為你祈求。請你定一個時間，𠊎來為你、你个官員、㧯你个人民祈禱。該時，所有个蛙仔全部會滅掉，只有尼羅河肚還有。」
10 國王應講：「請你天光日為𠊎祈求。」摩西講：「𠊎會照你所要求个做，你就知天下無像上主—𠊎等个上帝恁樣个神。
11 蛙仔會離開你、你个王宮、你个官員，㧯你个人民，只有尼羅河肚還有。」
12 摩西㧯亞倫離開埃及王出去；摩西祈禱上主，求上主將降給埃及王个蛙仔除掉。
13 上主照摩西所求个去做。所有在屋肚、庭院㧯田肚个蛙仔全部死掉。
14 埃及人將死蛙仔堆做一堆一堆，全國臭到無葛無煞。
15 總係，照上主所講个，國王一看到災難停掉，心又硬起來，毋肯聽摩西㧯亞倫个話。
16 上主對摩西講：「你愛㧯亞倫講，用佢个柺棍仔打地上个泥粉，使埃及全地个泥粉全部變做蝨乸。」
17 佢等就恁樣做。亞倫用柺棍仔打地上个泥粉，埃及全地个泥粉就變做蝨乸，人㧯頭牲身項全部有蝨乸。
18 行邪術个也想用佢等个法術使蝨乸出現，總係變毋出來。該時，人㧯頭牲身項全部有蝨乸。
19 行邪術个㧯國王講：「這件事係上帝親手做个！」總係，照上主所講个，國王个心還係恁硬，毋聽摩西㧯亞倫个話。
20 上主對摩西講：「天光日打早，你愛到河壩滣去見國王，㧯佢講：『上主恁樣講：放𠊎个子民走，俾佢等去敬拜𠊎。
21 𠊎警告你，你若毋肯放𠊎个子民走，𠊎就愛派歸大群个烏蠅飛到你、你个官員，㧯你个人民身上。埃及人家家戶戶會有烏蠅，滿地係烏蠅。
22 總係𠊎个子民所住个歌珊地區毋會有半隻烏蠅。𠊎恁樣做係愛俾你知，𠊎係全地个上主。
23 𠊎愛使𠊎个子民㧯你个人民有分別。這神蹟天光日就會實現。』」
24 上主就用歸大群个烏蠅飛入國王个王宮，也飛入佢官員个屋下；埃及全地受到烏蠅个災害。
25 國王喊摩西㧯亞倫來，講：「你等去啊，就在𠊎个國內向你等个上帝獻祭。」
26 摩西講：「恁樣做毋得！若係𠊎等獻頭牲給上主—𠊎等个上帝，埃及人會惱死𠊎等；俾埃及人看到𠊎等用頭牲獻祭會惹佢等發譴，佢等會用石頭㧹死𠊎等！
27 𠊎等一定愛照上主—𠊎等个上帝所命令个，行三日路，到曠野去向佢獻祭。」
28 國王講：「𠊎准你等到曠野去，向上主—你等个上帝獻祭，總係你等毋好走忒遠。你等愛為𠊎祈禱。」
29 摩西應講：「𠊎一離開就祈求上主在天光日使烏蠅全部離開你、你个官員㧯人民。總係國王毋好再騙𠊎等，阻擋𠊎等去向上主獻祭。」
30 摩西離開埃及王，去向上主祈禱；
31 上主照摩西所祈求个去做。烏蠅離開埃及王、佢个官員㧯人民，連一隻也無留下來。
32 總係這擺，國王个心還係恁硬，毋放以色列人走。