Exodus 39
1 佢等用藍色、紫色㧯深紅色个肨線攣祭司在聖所服事个時所著个高貴聖服。佢等又為亞倫做聖服。這係照上主吩咐摩西个話做个。
2 比撒列用金線，藍色、紫色、深紅色个肨線，㧯麻紗做以弗得聖服。
3 佢等將金仔打做薄薄，剪做細細條，㧯麻紗，藍色、紫色、深紅色个肨線，用幼秀个手工繡共下。
4 佢等又為以弗得做兩條做得繫个肩帶，攣在兩片。
5 該條連在以弗得、用來繫在身上个帶仔，㧯以弗得用共樣个材料，係用金線，藍色、紫色、深紅色个肨線，㧯麻紗刺个。這攏總係照上主吩咐摩西个話做个。
6 佢等又用兩垤紅瑪瑙鑲在金絲圈肚，刻等以色列十二個孻仔个名。
7 這兩垤寶石攣在以弗得个兩條肩帶上，代表以色列个十二支族。這攏總係照上主吩咐摩西个話做个。
8 佢用幼秀个手工造胸牌，㧯做以弗得共樣，用金線，藍色、紫色、深紅色个肨線，㧯麻紗攣好。
9 胸牌係四方形个，疊做兩層，長二十二公分，闊二十二公分。
10 佢等在胸牌頂高鑲四行寶石：第一行鑲紅寶石、黃玉、㧯紅玉；
11 第二行綠寶石、藍寶石、㧯鑽石；
12 第三行紫玉、白瑪瑙、㧯紫晶；
13 第四行水蒼玉、紅瑪瑙、㧯碧玉。這兜全部鑲在金絲圈頂高。
14 十二垤寶石个每一垤刻上以色列一個孻仔个名，代表以色列个十二支族。
15 佢等用純金造胸牌个鍊仔，像挼好个索仔。
16 佢等又造兩隻金絲圈㧯兩隻金圈仔，金圈仔安在胸牌頂高个兩頭。
17 佢等將兩條金鍊仔穿在胸牌兩頭个圈仔肚。
18 鍊仔个另外兩頭穿在兩隻金絲圈肚，連在以弗得頭前个肩帶頂高。
19 佢等又造兩隻金圈仔，安在胸牌下背个兩頭，偎近以弗得个內邊，
20 再造兩隻金圈仔，接在以弗得頭前兩條肩帶个下背，偎近攣个地方，在手工刺个帶仔頂高。
21 佢等用藍色个帶仔將胸牌个圈仔㧯以弗得个圈仔䌈共下，使胸牌貼在以弗得个帶仔頂高，就毋會𢫫掉。這攏總係照上主吩咐摩西个話做个。
22 佢用刺花个手工㧯藍色个肨線來做在以弗得底下个長衫。
23 長衫个中央留一個孔仔做領口，周圍加刺領邊，正毋會裂掉。
24 長衫下背个衫塍用藍色、紫色、深紅色个肨線，㧯麻紗做石榴，
25 又用純金个細玲琅隔在石榴中間。
26 這攏總係照上主吩咐摩西个話做个。
27 佢等為亞倫㧯佢該兜孻仔拿麻紗做內衫，
28 又用麻紗做帽仔、頭巾㧯短褲，
29 又用麻紗㧯藍色、紫色、深紅色个肨線，用繡花个手工來刺一條腰帶。這攏總係照上主吩咐摩西个話做个。
30 佢等又用純金造一面表示奉獻个牌仔，頂高刻等「歸上主為聖」。
31 佢等用藍色个帶仔將它繫在帽仔頭前。這攏總係照上主吩咐摩西个話做个。
32 聖帳篷，就係相見个帳篷，一切个工程全部完成。上主吩咐摩西个，以色列人全部做好。
33 佢等將聖帳篷㧯聖帳篷个所有用品全部帶到摩西面前，其中有：鉤仔、骨架、橫杠、柱仔㧯柱座；
34 染紅个羊牯皮頂蓋、盡靚个皮料頂蓋、隔等約櫃个帳幔；
35 約櫃、約櫃个槓仔，㧯贖罪个蓋仔；
36 供桌、桌个用品，㧯獻給上帝个供餅；
37 純金个燈臺、燈盞、其他个用品，㧯燈盞用个油；
38 金香壇、聖油、盡香个香、聖帳篷門口个門簾；
39 銅祭壇㧯壇頂个銅網、壇个槓仔㧯用品、洗盪盆㧯盆座；
40 圍庭院个帳幔、帳幔个柱仔㧯柱座；庭院門口个門簾㧯索仔、聖帳篷个釘仔；
41 祭司在聖所服事个時所著盡靚个聖服，就係祭司亞倫㧯佢該兜孻仔个聖服。
42 上主吩咐摩西个，以色列人民全部做好了。
43 摩西去看各項工程，看佢等所做个完全遵照上主个命令。摩西就祝福佢等。