Exodus 32
1 以色列人民看到摩西恁久還無下山，就聚集到亞倫个面前，對佢講：「𠊎等毋知該𢱋𠊎等出埃及个摩西堵到麼介事；所以拜託你為𠊎等造神明來帶領𠊎等！」
2 亞倫對佢等講：「將你等个𡜵娘㧯子女帶等个金耳環剝下來，拿來給𠊎。」
3 人民就全部剝下佢等个金耳環，送到亞倫面前。
4 亞倫就將該兜耳環鎔掉，倒在模仔肚，鑄造一隻細牛仔。人民就講：「以色列啊，這係𢱋你等離開埃及个神明！」
5 所以，亞倫在金牛像前起一座祭壇，宣佈講：「天光日愛為上主守節。」
6 第二日打早，人民牽兜頭牲來，有兜獻做燒化祭，也有兜做平安祭來食。後來，佢等坐下來大食大啉，企起來狂歡暢樂。
7 上主對摩西講：「遽遽下山，因為你對埃及𢱋出來个人民已經犯罪違背𠊎。
8 佢等隨時就偏離𠊎命令佢等行个路。佢等用金仔鑄造一隻細牛仔，向牠跪拜、向牠獻祭。佢等乜講：『以色列啊，這係𢱋你等離開埃及个神明！』」
9 上主繼續對摩西講：「𠊎已經看出來，這人民樣會恁硬頸！
10 這下，你毋好阻擋𠊎；𠊎愛向佢等大發譴，消滅佢等。總係你，𠊎愛使你㧯你个子孫成做大國。」
11 總係摩西向上主—佢个上帝求情講：「上主啊，做麼介對你个子民發譴到恁厲害呢？佢等敢毋係你用大能大力對埃及𢱋出來个？
12 做麼介俾埃及人講，你故意𢱋佢等離開埃及，係愛在山肚將佢等完全消滅呢？求你毋好發譴，求你回心轉意，毋好降大災禍給你个子民。
13 求你紀念你个僕人亞伯拉罕、以撒、以色列，記得你識指等自家向佢等發誓，講：『𠊎愛俾你等个子孫多到像天頂个星仔恁多；𠊎所應許這歸垤土地，一定愛賜給你等个後代，做永久个產業。』」
14 因為恁樣，上主改變心意，無將原來愛降个災禍降在佢子民个身上。
15 摩西轉身下山，拿等兩垤兩面寫等誡命个石版。
16 上帝自家造這兩垤石版；誡命也係上帝親手刻在頂高个。
17 約書亞聽到人民呼喊个聲音，就對摩西講：「𠊎聽到營中有戰爭个聲！」
18 摩西講：「這毋像相㓾打贏个聲，也毋像打輸个聲，係唱歌个聲！」
19 摩西行近營地个時，看到金牛㧯跳舞个人群，佢就大發譴，將帶轉來个兩垤石版在山腳下抨碎掉。
20 佢將人民鑄造个細牛仔拿過來鎔掉，研做粉，委在水面上，然後喊以色列人啉。
21 摩西對亞倫講：「這兜人對你做麼介，你樣般會害佢等犯恁重个罪？」
22 亞倫應講：「請你毋好恁譴；你也知這兜人決心作惡。
23 佢等對𠊎講：『𠊎等毋知該𢱋𠊎等出埃及个摩西堵到麼介事；所以拜託你為𠊎等造神明來帶領𠊎等！』
24 𠊎對佢等講：『該兜有金器个人愛剝下來』；佢等就拿來給𠊎。𠊎將金器㧹落火肚去，這細牛仔就出來！」
25 摩西看出亞倫縱人民，佢等正敢恁亂來，成做敵人个笑話。
26 佢就企在營門前，大聲講：「所有屬上主个人全部愛到𠊎這位來！」所有个利未人就聚集在佢堘頭。
27 佢吩咐佢等：「上主—以色列个上帝命令你等逐儕將劍繫等，對這隻門到該隻門，在營肚滿遍行，㓾你等个兄弟、朋友、㧯鄰舍。」
28 利未人順從摩西个命令，在該日大約㓾掉三千人。
29 摩西對利未人講：「你等今晡日已經將自家分別為聖，盡祭司事奉上主个職務，逐儕攻擊自家个孻仔㧯兄弟，恁樣得到上主个賜福。」
30 第二日，摩西對人民講：「你等犯盡重个罪了。這下𠊎愛再上山，到上主該位去，看𠊎有法度為你等贖罪，求到上主个赦免麼。」
31 所以摩西轉到上主該位，講：「主啊！這人民犯盡重个罪了；佢等鑄造金神像來跪拜。
32 求你赦免佢等个罪；若無，求你對你子民个名冊除掉𠊎个名。」
33 上主應講：「得罪𠊎个人，𠊎愛對𠊎名冊除掉佢等个名。
34 這下你去，將人民帶到𠊎指示你个地方。𠊎愛派天使在你頭前𢱋你。總係到算數該日，𠊎愛責罰佢等所犯个罪。」
35 上主就使人民發瘟仔，因為佢等跪拜亞倫鑄造个金牛像。