Exodus 30
1 「你愛用金合歡木造一座燒香个壇。
2 壇係四方个，長四十五公分，闊四十五公分，高九十公分。這壇个四隻角愛㧯壇連做歸垤。
3 愛用純金包等壇个頂高、四邊、㧯四角，周圍鑲齒形金邊。
4 愛造兩隻用來扛壇个金圈仔，安在壇兩片金邊下背，俾扛壇个槓仔穿過去。
5 愛用金合歡木造槓仔，用金包等。
6 香壇愛放在約櫃前个帳幔外，面對等約櫃頂高贖罪个蓋仔，就係𠊎愛㧯你相會个地方。
7 逐日朝晨，亞倫來整理燈盞个時，愛在壇頂燒當香个香。
8 臨暗仔點燈火个時，佢也一定愛燒香。世世代代愛繼續在𠊎—上主面前恁樣獻香，做毋得停。
9 做毋得在這壇頂燒無合規定个香，抑係獻燒化祭抑係素祭，也做毋得在頂高獻祭酒。
10 每年一擺，亞倫愛行潔淨个禮儀，用贖罪祭牲个血膏在壇个四角頂。世世代代愛遵行這禮儀。這壇愛完全分別為聖，奉獻給𠊎—上主。」
11 上主對摩西講：
12 「你調查以色列人口个時，逐儕人全部愛向𠊎獻贖命金，調查期間佢就毋會堵到麼介災禍。
13 受調查个人一定愛照聖所規定个標準納固定个錢額，做獻給𠊎个禮物。
14 每一個登記个人，就係二十歲以上个男人，全部愛納這錢額。
15 納贖命金無分貧富；有錢人毋使加納，窮人也做毋得少納。
16 你愛對以色列人民收這贖命金，拿去做聖帳篷个維護費用。這係佢等為自家个生命付出个捐獻；𠊎—上主會因為恁樣記得保護佢等。」
17 上主對摩西講：
18 「你愛造一個洗盪用个銅盆㧯一個盆座，拿來放在聖帳篷㧯祭壇中間。盆肚愛裝水。
19 亞倫㧯佢該兜孻仔進入聖帳篷，抑係行近祭壇去獻火祭給𠊎以前，愛用這盆肚个水洗手、洗腳。
20 恁樣佢等就毋會死；
21 佢等一定愛洗手、洗腳正毋會死。這係佢等㧯佢等个子孫永遠愛遵守个例規。」
22 上主對摩西講：
23 「愛拿上等个香料：流質个沒藥六公斤、香肉桂三公斤、香菖蒲三公斤、
24 㧯六公斤个桂皮(全部照聖所規定个標準來秤)，加上四公升个橄欖油，
25 用造香水个方法來製造聖油。
26 愛用這聖油膏抹𠊎个聖帳篷、約櫃、
27 供桌㧯桌頂个所有用品、燈臺㧯所有个用品、香壇、
28 獻燒化祭个壇㧯所有用品、還有洗盪盆㧯盆座。
29 這一切愛用這方法來奉獻，使它兜完全分別為聖；所有憑到个人抑係東西全部會分別為聖。
30 愛為亞倫㧯佢該兜孻仔膏聖油，立佢等做祭司事奉𠊎。
31 你愛㧯以色列人講：『世世代代，你等愛在事奉𠊎个時，用這聖油。
32 做毋得將聖油倒在普通人身上，也做毋得用這配方另外做其他相像个油。這油係聖个；你等一定愛將它看做聖物。
33 若有其他个人製造像這種油，抑係用這油來膏祭司以外个人，一定愛將佢對𠊎个子民中除掉。』」
34 上主對摩西講：「愛拿下背各樣當香个香料：蘇合香、香螺、白松香、㧯純乳香，平重个量，
35 用造香水个方法來製造，加兜純鹽；然後將它分別為聖。
36 愛拿一部份來，舂到變幼粉，帶到𠊎个聖帳篷，放在約櫃頭前—就係𠊎愛㧯你相會个地方。這香係至聖个東西。
37 做毋得用共樣个配方為自家製造共樣个香；因為它係獻給𠊎个聖物。
38 若有其他个人製造像這種香，自家享受香味，一定愛將佢對𠊎个子民中除掉。」