Bible

1 上主對摩西講：「𠊎愛對埃及王㧯佢个人民降加一個災難。這擺以後，佢一定放你等走。事實上，佢會將你等全部逐出這地方。 2 這下你愛去㧯以色列人講，喊佢等男女逐儕去向鄰舍討金器㧯銀器。」 3 上主使埃及人尊敬以色列人。埃及王个官員㧯人民全部尊摩西做偉大个人物。 4 摩西對埃及王講：「上主恁樣講：『今暗晡差毋多在半夜，𠊎愛行透埃及全地。 5 埃及人每一個長子，對承接王位个王子到挨礱个奴婢所𫱔个長子，全部會死。頭胎个頭牲也全部會死。 6 埃及全國會有大噭个聲音；這係自從毋識有，以後也毋會有个。 7 總係以色列人該位，連狗仔吠人抑係吠頭牲个聲音乜無。該時，你會知𠊎係上主；係𠊎使埃及人㧯以色列人有分別。』」 8 最後摩西講：「你這一切个官員全部愛到𠊎面前來，跪等求𠊎帶𠊎个同胞離開。到該時，𠊎正會離開。」摩西就譴到氣勃勃對埃及王面前行出去。 9 上主識對摩西講過：「埃及王還係毋聽你等个話，恁樣，𠊎就愛在埃及行還較多个神蹟。」 10 摩西㧯亞倫在國王面前行這恁多神蹟，總係上主使國王心硬，佢還係毋放以色列人離開佢个國家。