Ephesians 5
1 既然你等係上帝所惜个子女，你等就應該效法上帝。
2 你等个行事做人愛憑愛心，像基督惜𠊎等，為𠊎等犧牲生命，做香香个供物㧯祭物獻給上帝一樣。
3 該兜姦淫、屙糟、抑係貪心个事情，在你等中間連提起也毋好，因為你等係上帝个聖民。
4 你等也毋好講淫亂、憨蚩、抑係下流个話；顛倒，你等愛講感謝上帝个話。
5 因為你等確實知，犯姦淫、屙糟、抑係貪心个人(貪心㧯拜偶像共樣)絕對不能領受基督㧯上帝國底背个福份。
6 毋好被麼人用虛假个話騙走；因為這兜事，上帝會對該兜悖逆个人大發譴。
7 所以，毋好同這種人結交。
8 頭擺你等在烏暗中，總係自從成做主个信徒，你等就在光明中；恁樣，你等个生活應當愛像光明个子女。
9 光明所結豐盛个果子就係一切个良善、公義，㧯真理。
10 你等愛查考麼介係主所歡喜个事。
11 毋好做別人在暗中所做該兜無利益个事情，反轉愛將該兜事情掀出來。
12 (佢等在暗中所做个事，連講起也係盡見笑！)
13 一切事情在光明中一公開，真相就顯明出來；
14 因為使一切顯明出來个就係光。所以，詩人恁樣講：睡目个人啊，好醒了！對死人中䟘起來！基督就愛光照你。
15 所以，你等个行為愛細膩。毋好像無智識个人，愛像有智慧个人。
16 愛把扼機會，因為這下个世代邪惡。
17 所以，你等毋好愕愕咄咄過日仔；愛明白主个旨意係麼介。
18 毋好食到酒醉，啉忒多酒會害你等放蕩；顛倒，你等愛被聖靈充滿。
19 你等愛用詩篇、聖詩，㧯靈歌來對唱，口唱心和來讚美主。
20 凡事愛奉𠊎等主耶穌基督个名，常常感謝阿爸上帝。
21 愛因為敬畏基督來彼此順服。
22 做𡜵娘个，你等愛順從自家个老公，像順服主一樣。
23 因為老公係𡜵娘个頭，就像基督係教會个頭，也係教會全體个救主。
24 像教會順服基督，做𡜵娘个也應當凡事順從老公。
25 做老公个，你等愛惜自家个𡜵娘，像基督惜教會，為教會犧牲生命一樣。
26 佢恁樣做係愛通過真道㧯水來潔淨教會，使它成做聖潔，
27 好獻給自家，做榮光个教會，全無缺點、無垃圾、無打摺，就係純潔完全个教會。
28 共樣，做老公个應當惜自家个𡜵娘，像惜自家个身體一樣；惜𡜵娘就係惜自家。
29 無人怨恨自家个身體，總係保養㧯照顧，像基督對待教會一樣；
30 因為𠊎等係佢身上个肢體。
31 聖經講：「因為恁樣，人愛離開爺𡟓，㧯𡜵娘結合，兩儕成做一體。」
32 這個經節啟示極大个奧秘。𠊎知它係指基督㧯教會个關係來講个，
33 總係也做得用在你等中間：做老公个應當惜𡜵娘，像惜自家；做𡜵娘个也應當敬重老公。