Deuteronomy 31
1 摩西繼續對以色列人民講：
2 「這下𠊎已經一百二十歲，無法度繼續帶領你等了。上主也已經㧯𠊎講，𠊎做毋得過約旦河。
3 上主—你等个上帝會在你等頭前親自帶領你等過去，消滅該地个各民族，使你等佔領佢等个土地。照上主所講个，約書亞愛做你等个領袖𢱋你等過去。
4 上主樣般打贏亞摩利个兩個王—西宏㧯噩，毀壞佢等个國家，也愛照樣消滅該片个各民族。
5 上主愛將佢等交給你等；你等一定愛照𠊎个命令對付佢等。
6 愛堅強，愛勇敢，毋使驚佢等，因為上主—你等个上帝愛㧯你等共下去。佢毋會離開你等，毋會㧒掉你等。」
7 然後，摩西喊約書亞來，在以色列眾人面前對佢講：「你愛堅強，愛勇敢，因為你愛帶領人民去佔領上主應許賜給佢等祖先个土地。
8 上主愛在你頭前親自帶領你，㧯你共下去。佢毋會離開你，也毋會㧒掉你。所以，你做毋得無膽，也做毋得著驚。」
9 恁樣，摩西將這法律寫下來，交給該兜扛上主約櫃个利未祭司㧯以色列所有个長老。
10 摩西命令佢等講：「逐擺七年个最尾一年，就係免掉債務該年个搭寮仔節，
11 以色列人全部來到上主—你等个上帝所選个所在朝見佢，該時你等愛向佢等宣讀這法律。
12 你等愛召集所有个男人、婦女、細人仔，㧯住在你等城肚个外族人，好俾大家聽到，好俾大家學習敬畏上主—你等个上帝，確實遵行這法律一切个話。
13 恁樣，你等个子孫，就係該兜還吂聽到這法律个，會有機會聽到。佢等還生个日也愛在你等愛佔領个約旦河該片學習敬畏上主—你等上帝。」
14 上主對摩西講：「你無幾久就愛離開世間。你喊約書亞到聖帳篷來，𠊎愛給佢任務。」摩西㧯約書亞就來到聖帳篷。
15 有雲柱停在聖帳篷門口，上主在雲柱底背向佢等顯現。
16 上主對摩西講：「你快會㧯祖宗同睡了；你死後，這人民會在佢等愛入去个土地去拜別个神明、行姦淫，離開𠊎，違背𠊎㧯佢等立个約。
17 該時，𠊎會對佢等發譴，㧒掉佢等，揞等面毋搭佢等；佢等就會消滅。盡多災難會臨到佢等身上，佢等就知這係因為𠊎—佢等个上帝無再㧯佢等共下。
18 該時，𠊎會揞等面毋幫助佢等；因為佢等行邪惡个事，去拜別个神明。
19 「這下你愛寫下這首詩歌，教以色列人民，俾佢等背，使這首歌成做𠊎責備佢等个證據。
20 𠊎愛照向佢等祖先个應許，𢱋佢等到該流乳㧯蜜、盡肥个土地。在該位，佢等會過毋愁食毋愁著个生活。總係佢等會離開𠊎，去拜別个神明，㧒掉𠊎，違背𠊎个約。
21 盡多災難會臨到佢等身上。總係這首歌還係會流傳，會成做責備佢等个證據。雖然𠊎還吂𢱋佢等到𠊎應許愛給佢等个土地，總係𠊎已經知佢等个心思意念。」
22 該日，摩西就寫下這首詩歌，教以色列人民。
23 後來，上主對嫩个孻仔約書亞講：「你愛堅強，愛勇敢，因為你愛帶領以色列人民入去𠊎應許給佢等个土地。有𠊎㧯你共下。」
24 摩西將上主个法律寫在書上；佢將全部寫下來。
25 寫好以後，佢對該兜扛上主約櫃个利未祭司講：
26 「你等愛將這法律書放在上主—你等上帝个約櫃堘頭，留在該位，成做佢責備佢子民个證據。
27 𠊎知佢等盡硬頸盡悖逆。𠊎在世間个時，佢等長透悖逆上主，𠊎死後，佢等會還較悖逆。
28 你等愛召集各支族个長老㧯官員到𠊎面前來，𠊎愛將這兜話講給佢等聽。𠊎愛警告佢等，又愛喊天地來做證。
29 𠊎知，𠊎死後人民會非常敗壞，偏離𠊎所吩咐佢等个道。將來，佢等受到災難係因為佢等做上主看做邪惡个事，佢等手所做个惹佢發譴。」
30 後來，摩西在以色列全會眾面前大聲唸這首詩：