Deuteronomy 20
1 「你等出去㧯敵人相㓾，看到佢等个戰車、戰馬㧯軍隊比你等較多个時，毋使驚，因為救你等離開埃及个上主—你等个上帝會㧯你等同在。
2 你等相㓾以前，祭司愛行前向軍隊講：
3 『以色列人啊，你等愛聽！今晡日你等出去㧯敵人相㓾，毋好恁無膽，毋使緊張，毋使驚，毋使顫；
4 因為上主—你等个上帝會㧯你等共下去；佢會為你等㧯敵人相㓾，使你等打贏。』
5 「接等，長官愛對部下宣佈：『你等當中有麼人屋仔起好還吂行奉獻禮？恁樣个人做得轉去。驚怕佢戰死，別人代佢奉獻屋仔。
6 你等當中有麼人種葡萄園還吂收成？恁樣个人做得轉去。驚怕佢戰死，別人享受佢个葡萄。
7 你等當中有麼人過定了，還吂結婚？恁樣个人做得轉去。驚怕佢戰死，別人討佢个未婚妻。』
8 「長官又愛對部下講：『若係你等當中有人無膽，驚死，佢乜做得轉去。驚怕佢會影響全軍个士氣。』
9 長官向部下宣佈以後，愛指派各單位个指揮官。
10 「你等攻打一座城个時，愛先俾城肚个人有機會投降。
11 若係佢等打開城門投降，城肚所有个人全部愛做你等个奴才，代你等做苦工。
12 若係佢等毋投降，愛㧯你等對抗，你等就愛圍困該城。
13 上主—你等个上帝使你等佔領該城以後，你等就愛將城肚个男人㓾淨淨。
14 若係婦人家、細人仔、頭牲㧯城肚其他个東西，你等做得看做戰利品拿去用，因為係上主—你等个上帝賜給你等个。
15 這條例只有適用在該兜離你等愛住个所在當遠个城市。
16 「總係，在上主—你等个上帝愛賜給你等个土地上、在佔領該兜城以後，你等愛將所有个人㓾淨淨。
17 你等愛遵照上主—你等上帝个命令消滅所有个赫人、亞摩利人、迦南人、比利洗人、希未人、耶布斯人，
18 免得佢等拐騙你等去學佢等拜偶像个種種壞風俗，得罪上主—你等个上帝。
19 「你等攻打一座城个時，就算圍困當久，也做毋得斬掉果樹。你等做得食樹頂个果子，總係做毋得將樹仔斬掉，因為樹仔毋係你等个敵人！
20 你等做得斬無結果子个樹仔做材料，來造攻打城个設備，直到將該城打下來。」