Daniel 5
1 有一暗晡，伯沙撒王邀請一千個大臣來參加盛大个筵席，共下啉酒作樂。
2 佢啉酒个時，伯沙撒命令將厥爸尼布甲尼撒對耶路撒冷聖殿搶來个金杯銀碗搬出來，好俾佢㧯佢个大臣、王后、嬪妃啉酒用。
3 僕人就將耶路撒冷上帝聖殿該兜金杯銀碗搬出來，俾佢等啉酒用。
4 佢等緊啉酒，緊頌讚該兜用金、銀、銅、鐵、樹頭、石頭製造个神明。
5 忽然間，有一隻人手出現，用手指在王宮粉過个壁頂、燈臺對面个所在寫字。王看到該寫字个手，
6 面色一下仔就變到癧青，驚到兩腳愊愊掣，膝頭顫到相磕。
7 佢盡命喊，命令人將行邪術个、會法術个、㧯星象家喊來。佢等一到，王對巴比倫這兜鰲人講：「麼人會讀壁頂个字，解釋它个意思，𠊎就賜佢著王个紫袍，戴金脖鍊，在王國內坐第三隻高位。」
8 王宮顧問全部行前去；總係無一儕會讀該兜字，也無人有辦法㧯王解釋它个意思。
9 伯沙撒王非常著驚，面色大變；眾大臣全部無葛無煞。
10 太后聽到王㧯大臣盡命喊个聲，就入到筵席大廳，對王講：「願王萬歲！毋使驚到面無血色。
11 你國內有一個人，佢心肚有至聖神明个靈。若爸在位个時，這個人識表現超過凡人个才能、智識㧯像神明該種个智慧。若爸尼布甲尼撒王設立佢做所有算命个、行邪術个、會法術个，㧯星象家个領袖。
12 佢个能力非常厲害，有智慧又有特別个才能，會解夢、解答疑難、解釋奧秘个事。所以，請派人喊佢來。佢个名安到但以理；王又㧯佢安到伯提沙撒。佢會為你解釋這兜字个意思。」
13 但以理就被人帶到王面前。王問佢：「你係但以理，係吾父王對猶大捉來个猶太人係麼？
14 𠊎聽講你心肚有神明个靈；你有特別个才能、智識㧯智慧。
15 𠊎喊這兜顧問㧯行邪術个來，愛佢等讀這壁頂高个字，為𠊎解釋字个意思；總係佢等全部做毋到。
16 𠊎聽講你當會解釋奧秘，也會解答疑難。若係你有辦法讀這兜字，為𠊎解釋字个意思，你就會得到獎賞，著王个紫袍，戴金脖鍊，在王國內坐第三隻高位。」
17 但以理應講：「請王將獎賞留等，抑係賞給別人。總係，𠊎還係會為王讀這兜字，並解釋字个意思。
18 「王啊，至高个上帝識將國位、大權、榮耀㧯威嚴賜給若爸尼布甲尼撒；
19 所以，逐國、逐族、講逐種話个人全部盡驚佢。佢管生死大權，也有權照自家个意思提高抑係降低人个地位。
20 總係，佢驕傲、頑固、殘忍个時，佢被人解除王位，失掉光榮。
21 佢對人群中被人逐走，佢个心變像野獸一樣。佢㧯野驢共下生活，像牛恁樣食草，睡在野外，由在露水打濕。最尾，佢承認至高上帝有權掌管人个國家，有權將國權賜給佢所揀選个人。
22 「伯沙撒啊，你係尼布甲尼撒个孻仔，你雖然知這一切，總係毋知謙卑，
23 反轉驕傲，㧯天頂个主做對敵。你將對佢聖殿搶來个杯碗搬出來，給你自家㧯你个大臣、王后、嬪妃啉酒用，又頌讚該兜用金、銀、銅、鐵、樹頭、石頭製造个神明，就係該兜毋會看，毋會聽，麼介也毋知个偶像。你無尊敬該決定你生死，掌管你行動个上帝，
24 所以，上帝派一隻手來寫這兜字。
25 「這兜字係：『算數，算數，秤砣，分裂。』
26 『算數』，意思係：上帝已經算好你國家个年日，使國運終止。
27 『秤砣』，意思係：上帝已經將你放在秤仔頂高，秤出你个份量毋罅。
28 『分裂』，意思係：你个國愛分裂，歸給米底亞人㧯波斯人。」
29 所以，伯沙撒就命令僕人給但以理著王个紫袍，戴金脖鍊，又宣佈佢在王國內坐第三隻高位。
30 該暗晡，巴比倫王伯沙撒被人暗殺。
31 六十二歲个米底亞人大流士得到統治權。