Daniel 10
1 塞魯士做波斯王个第三年，上帝向又安到伯提沙撒个但以理啟示一個信息。這信息係真實个，總係當難了解。但以理在異象中得到了解。
2 該時，𠊎—但以理悲傷三個禮拜。
3 𠊎三禮拜無食滂沛，無食肉，無啉酒，無膏油，也無梳頭。
4 正月二十四，𠊎企在底革里斯大河壩滣。
5 𠊎昂頭看，看到有一儕著細麻紗个衫，繫等黃金做个腰帶。
6 佢个身體像寶石發光，面像𥍉爧；目珠像火把盡光，手腳像拭金个銅；佢講話个聲量像歸群人喊个聲。
7 只有𠊎—但以理一儕看到這異象。㧯𠊎共下个人並無看到麼介；總係佢等全部非常著驚，就走去囥。
8 𠊎一儕留在該位，看到這奇妙个光景。𠊎全身無力，面無血色，強強企毋住。
9 一聽到佢个聲音，𠊎就伏在地上，毋知人事。
10 忽然間，有一隻手扶等𠊎，使𠊎用手㧯膝頭撐起來；總係𠊎還係全身愊愊掣。
11 天使對𠊎講：「上帝所惜个但以理啊，企起來，注意聽𠊎㧯你講个話；𠊎係受派到你這位來个。」佢講煞，𠊎還緊顫企起來。
12 佢就對𠊎講：「但以理啊，毋使驚！自從第一日你謙卑在上帝面前祈求愛明白這異象个意思，佢就聽你个祈禱。𠊎就係來為你解釋个。
13 總係波斯个護國天使阻擋𠊎二十一日。因為𠊎留在波斯王該位，有一位天使長米迦勒來幫助𠊎。
14 這下𠊎來，係為你解釋將來你个同胞所愛堵到个事；這係有關將來个異象。」
15 佢對𠊎講話个時，𠊎面伏地泥，恬恬無講話。
16 所以該款式像人个天使伸手摸𠊎个嘴唇，𠊎就開嘴，對佢講：「吾主啊，𠊎看到這異象就全身無力，一直愊愊掣。
17 𠊎像一個奴才企在主人面前；𠊎樣做得㧯你講話呢？𠊎已經無力，無辦法透氣。」
18 佢再一擺扶𠊎，使𠊎恢復元氣。
19 佢講：「上帝所惜个人啊，毋使驚！願你平安！你愛堅強！」佢講這個話以後，𠊎就感覺有力了。𠊎講：「吾主啊，你使𠊎个力量恢復；你做得㧯𠊎講話了！」