Bible

1 至高个上主俾𠊎看到一個光景：𠊎看到一籃當熟个水果。 2 佢問𠊎：「阿摩司，你看到麼介？」𠊎應講：「一籃當熟个水果。」上主對𠊎講：「𠊎子民以色列个末期已經到了。這擺𠊎絕對毋會赦免佢等！ 3 該日，宮廷个歌聲會變做悲哀个噭聲；身屍㧒到滿遍係。毋好出聲。」 4 你這兜踐踏艱苦人，剝削窮苦人个，你等愛聽！ 5 你等自家講：「初一个節日樣毋遽遽過去，好俾𠊎等去糶穀？安息日樣毋遽遽結束，好俾𠊎等去做生理？𠊎等做得提高價錢，用假秤砣、細升斗去騙人客了。 6 𠊎等來賣壞掉个麥仔；𠊎等用錢銀買窮苦人，用一雙草鞋換貧窮人。」 7 上主—以色列个上帝發誓講：「𠊎絕對毋會毋記得以色列人个壞行為。 8 為到恁樣，𠊎敢毋會使地動發生？所有住這地方个人敢毋會悲傷歎息？大地會震動，像尼羅河个河水恁樣浮起沈落。 9 到該日，𠊎愛使日頭還當晝就落山，日時頭變做暗摸摸。這係𠊎—至高个上主講个。 10 𠊎愛使你等个慶典變做葬禮，歡樂个歌聲變做傷心大噭。𠊎愛使你等剃光頭、著麻衫。你等會傷心到像死單丁子恁樣，歸日非常痛苦。 11 「日仔會到了，𠊎愛使以色列全地飢荒。佢等肚飢，毋係因為無餅好食；佢等嘴燥，毋係因為無水好啉；係因為聽毋到上主个話。這係𠊎—至高个上主講个。 12 佢等會對南到北行上行下，對東到西走來走去，逐所在尋上主个話，總係尋毋到。 13 在該日，連盡靚个細妹仔㧯強壯个青年也會因為嘴燥來昏掉。 14 該兜拜過撒馬利亞个偶像、向但㧯別是巴个神明許過願个人，全部會橫落去，永遠䟘毋起來。」