Acts 5
1 另外有一個人，名安到亞拿尼亞；佢㧯厥𡜵娘撒非喇賣掉一兜田產。
2 佢暗中留下一兜錢，將賸个交給使徒；這件事厥𡜵娘也知。
3 彼得對佢講：「亞拿尼亞，你做麼介俾撒但控制你个心，來騙聖靈，將賣田產个錢暗中留下一兜呢？
4 田產吂賣，係你个；賣掉以後，錢還係你管个。你樣般存心恁樣做呢？你毋係騙人，係騙上帝！」
5 亞拿尼亞一聽到這個話，就橫落去，死掉。所有聽到這件事个人全部大著驚。
6 有幾個後生人入來，將佢个屍體包起來，扛出去埋。
7 大約過三點鐘，厥𡜵娘也入來；姖還毋知所發生个事。
8 彼得對姖講：「你㧯𠊎講，你等賣田產个錢就係這兜嗎？」姖應講：「係，全部在這位。」
9 彼得講：「你等做麼介同心試探主个靈呢？你看，埋若老公个人已經到門口，佢等也愛將你扛出去！」
10 姖黏時也橫在彼得个腳前，死掉。該兜後生人入來，看到姖已經死掉，就將姖扛出去，埋在厥老公个堘頭。
11 全教會㧯所有聽到這兜事个人攏總非常著驚。
12 有盡多神蹟奇事通過使徒个手，在民間發生；所有个信徒同心合意在所羅門廊下聚集。
13 雖然一般民眾尊重佢等，總係除了信徒以外，無人敢接近佢等。
14 該時，信主个人緊來緊多，男女都有。
15 因為使徒行盡多神蹟，有兜人就將病人扛到街路，放在眠床頂抑係草蓆頂，希望彼得行過去个時，佢个影仔會遮到一兜人个身上。
16 還有一大群人帶等病人㧯邪靈附身个人，對耶路撒冷附近个鄉鎮來；這兜病人全部得到醫好。
17 大祭司㧯該兜同佢共黨个人，就係當地个撒都該人，對使徒非常嫉妒；所以佢等就決心愛採取行動。
18 佢等下手捉使徒，將佢等關在監獄。
19 總係該暗晡，主个天使打開監門，帶使徒出來，㧯佢等講：
20 「你等去，企在聖殿肚，對民眾傳關係這新生命个道理。」
21 使徒聽從這個話，天曚光个時，佢等就入去聖殿教訓人。大祭司㧯佢个同黨召集議會所有以色列人个長老來舉行大會，然後喊人去監獄將使徒帶來。
22 總係，警衛去到个時，發現該兜使徒無在監獄肚，就倒轉去議會報告，講：
23 「𠊎等去到監獄，看到監門鎖到好好，看守个人也在門外掌等；總係𠊎等打開監門，發現底背連一個人也無！」
24 聖殿个警衛長㧯該兜祭司長聽到這個報告，無葛無煞，毋知這件事會樣般。
25 這時，有一個人入來報告講：「你等關在監獄肚个人，這下企在聖殿肚教訓民眾！」
26 所以該警衛長帶等部下去，將使徒帶轉來。佢等無用暴力，因為驚民眾用石頭㧹佢等。
27 佢等將使徒帶來，喊佢等企在議會前。大祭司審問佢等，
28 講：「𠊎等識嚴嚴禁止你等，做毋得用這人个名教訓人，你等反轉將你等這個道理傳遍耶路撒冷，想愛將殺害這人个血債歸在𠊎等个身上！」
29 彼得㧯其他个使徒應講：「順服上帝，毋順服人，這係應當个！
30 你等所釘死在十字架頂个耶穌，𠊎等祖先个上帝已經使佢復活。
31 上帝高升佢，使佢在自家个右片做領袖，做救主，愛給以色列人有悔改个機會，使佢等个罪得到赦免。
32 𠊎等就係這兜事个見證人；上帝賜給順服佢个人个聖靈也㧯𠊎等共下做證。」
33 議會个議員聽了這個話，非常譴，想愛殺害該兜使徒。
34 總係，佢等當中有一個法利賽人，名安到迦瑪列，係眾人非常敬重个經學教師；佢在議會中企起來，吩咐人帶使徒出去一下，
35 然後對議員講：「以色列同胞啊，你等處理這兜人个事，一定愛細膩！
36 以前，杜達興起來，自稱做大，約有四百儕跈佢。最尾，佢被人㓾死，跈佢个人也散掉去，暴亂就平靜下去。
37 以後又有加利利个猶大在戶口調查个時興起來，引誘好多人跈佢；佢也被人㓾死，跈佢个人也散掉去。
38 對眼前這件事，𠊎㧯你等講，莫㧯佢等作對，由在佢等！若係佢等所計劃、所做个，係人个意思，一定會失敗；
39 假使係上帝个旨意，你等就無法度打橫佢等。你等所做个，驚怕反轉係攻擊上帝！」議會接納迦瑪列个意見，
40 就喊使徒入來，鞭打佢等，又命令佢等做毋得再用耶穌个名講道理，然後透放佢等。
41 使徒離開議會，因為堪得為耶穌个名受侮辱，心肝非常歡喜。
42 佢等還係逐日在聖殿肚㧯人屋下繼續教訓人，傳揚有關耶穌係基督个福音。